Odas de Salomón

Oda 3, estrofa 1

[ܪܚܶܡܬܶܗ ܕܡܳܪܝܳܐ] ܡܰܠܒܶܫ ܐ̱ܢܳܐ.

Oda 3, estrofa 2

ܘܗܰܕܳܡ̈ܘܰܗ̱ܝ ܠܘܳܬܶܗ ܐܶܢܽܘܢ܆ ܘܰܒܗܽܘܢ ܬܠܷܐ ܐ̱ܢܳܐ ܘܡܰܚܶܒ ܠܺܝ.

Oda 3, estrofa 3

ܠܴܐ ܓܶܝܪ ܝܴܿܕܰܥ ܗ̄ܘܺܝܬ ܠܡܶܪܚܰܡ ܠܡܳܪܝܳܐ܆ ܐܶܠܘܽ ܗܼܽܘ ܠܴܐ ܪܳܚܷܿܡ ܗ̄ܘܼܳܐ ܠܺܝ.

Oda 3, estrofa 4

ܡܰܢܽܘ ܡܶܫܟܰܚ ܠܡܶܦܪܰܫ ܪܶܚܡܬܳܐ܆ ܐܶܠܳܐ ܗܰܘܿ ܕܡܶܬܪܚܶܡ.

Oda 3, estrofa 5

ܡܰܚܶܒ ܐ̱ܢܳܐ ܠܰܪܚܺܝܡܳܐ ܘܪܳܚܿܡܳܐ ܠܶܗ ܢܰܦܫܝ܆ ܘܐܱܝܟܳܐ ܕܰܢܝܳܚܶܗ ܐܳܦ ܐܶܢܳܐ ܐܻܝܬܰܝ.

Oda 3, estrofa 6

ܘܠܴܐ ܐܶܗܘܶܐ ܢܽܘܟܪܳܝܳܐ܆ ܡܶܛܽܠ ܕܠܰܝܬ ܚܣܳܡܳܐ ܠܘܳܬ ܡܳܪܝܳܐ ܡܪܰܝܡܳܐ ܘܰܡܪܰܚܡܳܢܳܐ.

Oda 3, estrofa 7

ܐܶܬܡܱܿܙܓܶܬ ܡܶܛܽܠ ܕܶܐܫܟܰܚ ܪܳܚܿܡܳܐ ܠܗܰܘܿ ܪܚܺܝܡܳܐ܆ ܡܶܛܽܠ ܕܷܐܪܚܰܡ ܠܗܰܘܿ ܒܪܳܐ ܕܐܷܗܘܶܐ ܒܪܳܐ.

Oda 3, estrofa 8

ܗܰܘܿ ܓܶܝܪ ܕܡܶܬܢܰܩܰܦ ܠܗܰܘܿ ܕܠܴܐ ܡܴܿܐܷܬ܆ ܐܳܦ ܗܽܘܼ ܕܠܴܐ ܡܰܘܬܳܐ ܢܶܗܘܶܐ.

Oda 3, estrofa 9

ܘܗܰܘܿ ܕܰܒܚܰܝܷ̈ܐ ܡܶܨܛܒܶܐ܆ ܚܰܝܳܐ ܢܶܗܘܶܐ.

Oda 3, estrofa 10

ܗܳܕܶܐ ܗ̱ܝܼ ܪܽܘܚܶܗ ܕܡܳܪܝܳܐ ܕܠܳܐ ܕܰܓܳܠܽܘܬܳܐ܆ ܕܡܰܠܦܳܐ ܠܰܒܢܰܝ̈ܢܳܫܳܐ ܕܢܶܕܥܽܘܢ ܐܽܘܪ̈ܚܳܬܶܗ.

Oda 3, estrofa 11

ܐܶܬܚܰܟܰܡܘ ܘܕܰܥܘ ܘܐܷܬܬܥܺܝܪܘ. ܗܰܠܶܠܘܽܝܰܐ.

Oda 4, estrofa 1

ܠܳܐ ܐ̱ܢܳܫ ܡܫܰܚܠܶܦ ܐܰܬܪܳܟ ܩܰܕܺܝܫܳܐ ܐܰܠܳܗܝ܆ ܘܠܳܐ ܕܰܢܫܚܰܠܦܺܝܘܗ̱ܝ ܘܰܢܣܺܝܡܺܝܘܗ̱ܝ ܒܰܐܬܪܳܐ ܐ̱ܚܪܺܢܳܐ.

Oda 4, estrofa 2

ܡܶܛܽܠ ܕܠܰܝܬ ܥܰܠܰܘܗ̱ܝ ܫܽܘܠܛܳܢܳܐ܆ ܩܽܘܕܿܫܳܟ ܓܶܝܪ ܐܶܬܪܰܥܺܝܬ ܡܼܶܢ ܩܕܳܡ ܕܬܶܥܒܶܕ ܐܰܬܪ̈ܰܘܳܬܳܐ.

Oda 4, estrofa 3

ܩܰܫܺܝܫܳܐ ܠܴܐ ܢܶܫܬܰܚܠܰܦ ܡܼܶܢ ܗܳܢܽܘܢ ܕܰܒܨܺܝܪܺܝܢ ܡܶܢܶܗ܆ ܝܰܗ̄ܒܼܬ ܠܶܒܳܟ ܡܳܪܝܳܐ ܠܰܡܗܰܝ̈ܡܢܰܝܟ.

Oda 4, estrofa 4

ܠܴܐ ܡܬܽܘܡ ܬܶܒܛܰܠ܆ ܘܠܴܐ ܬܶܗܘܶܐ ܕܠܴܐ ܦܺܐܪ̈ܶܐ.

Oda 4, estrofa 5

ܚܕܳܐ ܓܶܝܪ ܫܳܥܬܳܐ ܕܗܰܝܡܳܢܽܘܬܳܟ܆ ܡܝܰܬܪܳܐ ܡܼܶܢ ܟܽܠܗܽܘܢ ܝܰܘ̈ܡܳܬܳܐ ܘܰܫܢܰܝܴ̈ܐ.

Oda 4, estrofa 6

ܡܰܢܽܘ ܓܶܝܪ ܢܶܠܒܰܫ ܛܰܝܒܽܘܬܳܟ ܘܢܶܬܛــܠܶܡ.

Oda 4, estrofa 7

ܡܶܛܽܠ ܕܚܳܬܡܳܟ [ܝܺܕܺ]ܝܥ ܗ̱ܽܘܼ܆ ܘܝܺܕܺܝ̈ܥܳܢ ܠܶܗ ܒܶܪ̈ܝܳܬܳܟ.

Oda 4, estrofa 8

ܘܚܰܝ̈ܠܰܘܳܬܳ[ܟ ܐܰ]ܚܺܝܕܺܝܢ ܠܶܗ܆ ܘܪ̈ܰܒܰܝ ܡܰܠܴܰܐܟܷ̈ܐ ܓܒܰܝܴ̈ܐ ܠܒܺܝܫܺܝܢ ܠܶܗ.

Oda 4, estrofa 9

ܝܰܗ̱ܒܼܬ ܠܰܢ ܫܰܘܬܳܦܽܘܬܳܟ܆ ܠܴܐ ܗ̄ܘܼܳܐ ܕܚܰܣܝܺܪ ܐܰܢ̄ܬ ܡܶܢܰܢ܆ ܐܶܠܴܐ ܚܢܰܢ ܚܰܣܺܝܪܺܝܢܰܢ ܡܶܢܳܟ.

Oda 4, estrofa 10

ܪܽܘܣ ܥܰܠܰܝܢ ܪ̈ܣܺܝܣܰܝܟ܆ ܘܰܦܬܰܚ ܡܰܒ̈ܽܘܥܰܝܟ ܥܰܬܺܝܪ̈ܶܐ ܕܡܰܪܕܶܝܢ ܠܰܢ ܚܰܠܒܳܐ ܘܕܶܒܫܳܐ.

Oda 4, estrofa 11

ܠܰܝܬ ܓܶܝܪ ܬܘܳܬܳܐ ܠܘܳܬܳܟ܆ ܕܬܶܬܘܶܐ ܥܰܠ ܡܶܕܶܡ ܕܶܐܫܬܰܘܕܺܝܬ.

Oda 4, estrofa 12

ܘܚܰܪܬܳܐ ܓܰܠܝܳܐ ܗ̱ܘܳܬ ܠܳܟ.

Oda 4, estrofa 13

ܘܡܶܕܶܡ ܓܶܝܪ ܕܝܰܗܼܒܬ ܡܰܓܳܢ ܝܰܗ̱ܒܼܬ܆ ܕܠܴܐ ܡܶܟܺܝܠ ܬܬܘܽܦ ܘܬܶܣܰܒ ܐܶܢܶܝܢ.

Oda 4, estrofa 14

ܟܽܠ ܡܶܕܶܡ ܓܶܝܪ ܐܰܝܟ ܐܰܠܳܗܳܐ ܓܠܷܐ ܗ̱ܘܳܐ ܠܳܟ܆ ܘܡܰܬܩܰܢ ܗ̱ܘܳܐ ܡܼܶܢ ܒܪܺܝܫܺܝܬ ܩܕܳܡܰܝܟ.

Oda 4, estrofa 15

ܘܰܐܢ̱ܬ ܡܳܪܝܳܐ ܥܒܼܰܕܬ ܟܽܠ. ܗܰܠܶܠܘܽܝܰܐ.

Oda 5, estrofa 1

ܡܰܘܕܶܐ ܐ̱ܢܳܐ ܠܳܟ ܡܳܪܝܳܐ܆ (ܡܶܛܽܠ ܕܪܳܚܷܿܡ ܐ̱ܢܳܐ ܠܳܟ.)

Oda 5, estrofa 2

ܡܪܰܝܡܳܐ ܠܴܐ ܬܶܫܒܩܰܢܝ܆ ܡܶܛܽܠ ܕܣܰܒܪܝ ܐܰܢ̱ܬ ܗ̱ܽܘܼ.

Oda 5, estrofa 3

ܡܰܓܳܢ ܢܣܰܒܬ ܛܰܝܒܽܘܬܳܟ܆ ܐܶܚܶܐ ܡܶܢܳܗܿ.

Oda 5, estrofa 4

ܢܺܐܬܽܘܢ ܪ̈ܳܕܽܘܦܰܝ ܘܠܴܐ ܢܶܚܙܽܘܢܳܢܝ.

Oda 5, estrofa 5

ܥܢܳܢܳܐ ܕܥܰܡܛܳܢܳܐ ܬܶܦܼܶܠܝ [ܥܰܠ] ܥܰܝܢܰܝ̈ܗܽܘܢ܆ ܘܐܳܐܰܪ ܕܥܰܪܦܶܠܴܐ ܢܰܚܫܶܟ ܐܶܢܽܘܢܿ.

Oda 5, estrofa 6

ܘܠܴܐ ܢܶܗܘܶܐ ܠܗܽܘܢܿ ܢܽܘܗܪܐ ܕܢܶܚܙܽܘܢ܆ ܕܠܴܐ ܢܶܐܚܕܽܘܢܳܢܝ.

Oda 5, estrofa 7

ܠܥܽܘܒܴ̈ܝܶܐ ܬܶܗܘܶܐ ܬܰܪܥܺܝܬܗܽܘܢ܆ ܘܡܶܕܶܡ ܕܶܐܬܚܰܟܰܡܘ ܢܶܗܦܽܘܟ ܥܰܠ ܪ̈ܺܝܫܰܝܗܽܘܢܿ.

Oda 5, estrofa 8

ܐܶܬܚܰܫܰܒܘ ܓܶܝܪ ܬܰܪܥܺܝܬܳܐ܆ ܘܠܴܐ ܗܘܳܬ ܠܗܽܘܢ.

Oda 5, estrofa 9

(ܐܶܬܥܰܬܰܕܘ ܒܺܝܫܳܐܺܝܬ܆ ܘܐܶܫܬܟܰܚܘ ܟܰܕ ܣܪܺܝܩܺܝܢ).

Oda 5, estrofa 10

ܥܰܠ ܡܳܪܝܰܐ ܗ̱ܘܼ ܓܶܝܪ ܣܰܒܪܝ܆ ܘܠܴܐ ܐܶܕܚܰܠ.

Oda 5, estrofa 11

(ܘܡܶܛܽܠ ܕܡܳܪܝܰܐ ܗ̱ܘ ܦܽܘܪܩܳܢܝ܆) ܘܠܴܐ ܐܶܕܚܰܠ.

Oda 5, estrofa 12

ܘܰܐܰܝܟ ܟܺܠܝܠܱܐ ܗ̱ܘܼ ܒܪܺܝܫܝ܆ ܘܠܴܐ ܐܶܬܬܙܺܝܥ.

Oda 5, estrofa 13

ܘܐܶܢ ܢܶܬܬܙܺܝܥ ܟܽܠܡܶܕܶܡ܆ ܐܶܢܳܐ ܩܰܝܳܡ ܐ̱ܢܳܐ.

Oda 5, estrofa 14

ܘܐܶܢ ܢܺܐܒܰܕ ܡܶܕܶܡ ܕܡܶܬܚܙܶܐ܆ ܐܶܢܳܐ ܠܴܐ ܐܶܡܽܘܬ.

Oda 5, estrofa 15

ܡܶܛܽܠ ܕܡܳܪܝܳܐ ܥܰܡܝ ܗ̱ܘܼ܆ ܘܐܶܢܳܐ ܥܰܡܶܗ. ܗܰܠܶܠܘܽܝܰܐ.

Oda 6, estrofa 1

ܐܰܝܟ ܕܰܡܗܰܠܟܳܐ [ܪܽܘܚܳ]ܐ ܒܩܺܝܬܼܳܪܳܐ܆ ܘܡܶܢ̈ـܷܐ ܡܡܰܠ̈ـܠܳܢ܆

Oda 6, estrofa 2

ܗܳܟܰܢܳܐ ܡܰܡܠܠܴܐ ܒܗܰܕܳܡܱ̈ܝ ܪܽܘܚܶܗ ܕܡܳܪܝܳܐ܆ ܘܡܰܡܠܶܠ ܐ̱ܢܳܐ ܒܚܽܘܒܶܗ.

Oda 6, estrofa 3

ܡܰܘܒܶܕ ܗ̱ܽܘܼ ܓܶܝܪ ܡܶܕܶܡ ܢܽܘܟܪܳܝ܆ ܘܟܽܠܡܶܕܶܡ ܕܡܳܪܝܰܐ ܗ̱ܘܼ.

Oda 6, estrofa 4

ܗܳܟܰܢܳܐ ܓܶܝܪ ܗܘܼܳܐ ܡܶܢ ܒܪܺܝܫܺܝܬ܆ ܘܰܥܕܰܡܳܐ ܠܰܐ̄ܚܪܳܝܬܳܐ.

Oda 6, estrofa 5

ܕܠܴܐ ܡܶܕܶܡ ܢܶܗܘܶܐ ܣܰܩܽܘܒܠܴܐ܆ ܘܠܴܐ ܡܶܕܶܡ ܢܩܽܘܡ ܠܩܽܘܒܠܶܗ.

Oda 6, estrofa 6

ܐܰܣܓܺܝ ܝܺܕܰܥܬܶܗ ܡܳܪܝܳܐ܆ ܘܛܰܢ ܕܢܶܬܝ̈ܰܕܥܳܢ ܗܳܠܶܝܢ ܕܰܒܛܰܝܒܽܘܬܶܗ ܐܶܬܺܝܗܶܒ ܠܰܢ.

Oda 6, estrofa 7

ܘܬܶܫܒܽܘܚܬܶܗ ܝܰܗ̱ܒ ܠܰܢ ܠܰܫܡܶܗ܆ ܪ̈ܽܘܚܳܬܰܢ ܠܪܽܘܚܶܗ ܩܰܕܺܝܫܳܐ ܡܫܰܒ̈ܚܳܢ.

Oda 6, estrofa 8

ܢܦܰܩ ܓܶܝܪ ܬܰܦܳܐ ܘܰܗܘܳܐ ܢܰܗܪܳܐ ܪܰܒܳܐ ܘܦܰܬܝܳܐ܆ ܓܪܰܦ ܓܶܝܪ ܟܽܠܡܶܕܶܡ ܘܰܫܚܰܩ ܘܰܐܝܬܺܝ ܠܗܰܝܟܠܴܐ.

Oda 6, estrofa 9

ܘܠܴܐ ܐܶܫܟܰܚܘ ܟܠܳܐܘܽܗܝ (ܟܶܠ̈ܝܳܢܶܐ ܕܰܒ̈ܢܰܝ ܐ̱ܢܳܫܳܐ)܆ ܘܳܐܦ ܠܴܐ ܐܽܘܡܳܢ̈ܘܳܬܗܽܘܢܿ ܕܗܿܶܢܽܘܢܿ ܕܟܳܠܶܝܢ ܡܰܝܴ̈ܐ.

Oda 6, estrofa 10

ܐܶܬܳܐ ܓܶܝܪ ܥܰܠ ܐܰܦܱ̈ܝ ܟܽܠܳܗܿ ܐܰܪܥܳܐ܆ (ܘܰܡܠܴܐ ܟܽܠܡܶܕܶܡ.)

Oda 6, estrofa 11

(ܘܶܐܫܬܺܝܘ ܟܽܠܗܽܘܢܿ ܨܗ̈ܰܝܳܐ ܕܥܰܠ ܐܰܪܥܳܐ)܆ ܘܨܰܗܝܳܐ ܐܶܫܬܪܺܝ ܘܰܕܥܶܟ.

Oda 6, estrofa 12

ܡܼܶܢ ܡܪܰܝܡܳܐ ܓܶܝܪ ܐܶܬܺܝܗܶܒ ܡܰܫܬܝܳܐ.

Oda 6, estrofa 13

ܛܽܘܒܰܝܗܽܘܢܿ ܗܳܟܺܝܠ ܠܰܡܫܰܡ̈ܫܳܢܰܘܗ̱ܝ ܕܗܰܘܿ ܡܰܫܬܝܳܐ܆ ܗܳܢܽܘܢܿ ܕܶܐܬܗܰܝܡܰܢܘ ܡܰܘ̈ܗ̱ܝ.

Oda 6, estrofa 14

ܐܰܢܺܝܚܘ ܣܶܦ̈ܘܳܬܳܐ ܝܰܒܺܝ̈ܫܳܬܳܐ܆ (ܘܨܶܒܝܳܢܳܐ ܕܰܡܫܰܪܰܝ ܗ̱ܘܳܐ ܐܰܩܺܝܡܘ.)

Oda 6, estrofa 15

(ܘܢܰܦ̈ܫܳܬܳܐ ܘܰܕܩܰܪ̈ܺܝܒܳܢ ܗ̱ܘܰܝ̈ ܠܡܶܦܰܩ܆ ܡܼܶܢ ܡܰܘܬܳܐ ܐܶܚܰܕܘ ܐܶܢܶܝܢ.)

Oda 6, estrofa 16

ܘܗܰܕܶܡܷ̈ܐ ܕܢܰܦܺܝܠܺܝܢ ܗ̱ܘܰܘ܆ (ܘܰܬܪܰܨܘ ܘܰܐܩܺܝܡܘ).

Oda 6, estrofa 17

ܝܰܗ̱ܒܘ ܚܰܝܠܴܐ ܠܡܶܐܬܺܝܬܗܽܘܢ܆ ܘܢܽܘܗܪܳܐ ܠܥܰܝ̈ܢܰܝܗܽܘܢܿ.

Oda 6, estrofa 18

ܡܶܛܽܠ ܕܟܽܠ ܐ̱ܢܳܫ ܐܶܫܬܰܘܕܰܥ ܐܶܢܽܘܢܿ ܒܡܳܪܝܳܐ܆ ܘܰܚܝܰܘ ܒܡܰܝܴ̈ܐ ܚܰܝܷ̈ܐ ܕܰܠܥܳܠܰܡ. ܗܰܠܶܠܘܽܝܰܐ.

Oda 7, estrofa 1

ܐܰܝܟ ܪܶܗܛܳܗܿ ܕܚܶܡܬܳܐ ܥܰܠ ܥܰܘܳܠܽܘܬܳܐ܆ ܗܳܟܰܢܳܐ ܪܶܗܛܰܗܿ ܕܚܰܕܽܘܬܳܐ ܥܰܠ ܪܚܺܝܡܳܐ܆ ܘܡܼܶܢ ܦܺܐܪ̈ܶܝܗܿ ܡܰܥܶܠ ܕܠܴܐ ܟܶܠܝܳܢܳܐ.

Oda 7, estrofa 2

ܚܰܕܽܘܬܝ ܡܳܪܝܰܐ ܗ̱ܘܼ ܘܪܶܗܛܝ ܠܘܳܬܶܗ܆ ܗܳܕܶܐ ܐܽܘܪܚܝ ܫܰܦܺܝܪܳܐ.

Oda 7, estrofa 3

ܡܥܰܕܪܳܢܳܐ ܓܶܝܪ ܐܺܝܬ ܠܺܝ ܠܡܳܪܝܳܐ܆ ܐܰܘܕܥܰܢܝ ܢܰܦܫܶܗ ܕܠܴܐ ܚܣܳܡܳܐ ܒܰܦܫܺܝܛܽܘܬܶܗ܆ ܪܰܒܽܘܬܶܗ ܓܶܝܪ ܒܰܣܺܝܡܽܘܬܶܗ ܐܰܙܥܪܰܬ.

Oda 7, estrofa 4

ܗܘܳܐ ܐܰܟܘܳܬܝ ܡܶܛܽܠ ܕܶܐܣܒܺܝܘܗ̱ܝ܆ ܒܰܕܡܽܘܬܳܐ ܐܶܣܬܒܰܪ ܐܰܟܘܳܬܝ ܡܶܛܽܠ ܕܶܐܠܒܫܺܝܘܗ̱ܝ.

Oda 7, estrofa 5

ܘܠܴܐ ܙܳܥܶܬ ܟܰܕ ܚܙܺܝܬܶܗ܆ ܡܶܛܽܠ ܕܗܽܘܝܽܘ ܚܼܰܢܰܢܝ.

Oda 7, estrofa 6

ܐܰܝܟ ܟܝܳܢܝ ܗܘܳܐ ܡܶܛܽܠ ܕܰܐܠܦܺܝܘܗ̱ܝ܆ ܐܰܝܟ ܨܽܘܪܬܝ ܡܶܛܽܠ ܕܠܴܐ ܐܶܗܦܽܘܟ ܡܶܢܶܗ.

Oda 7, estrofa 7

ܐܰܒܽܘܗܿ ܕܺܝܕܰܥܬܳܐ܆ ܦܶܬܓܳܡܰܐ ܗܼ̄ܘ ܕܺܝܕܰܥܬܳܐ.

Oda 7, estrofa 8

ܗ݀ܰܘ ܕܰܒܪܳܐ ܚܶܟܡܬܳܐ܆ ܚܰܟܺܝܡ ܗ̱ܽܘܼ ܡܼܶܢ ܥ̈ܒܳܕܰܘܗ̱ܝ.

Oda 7, estrofa 9

ܘܗܰܘܿ ܕܰܒܪܳܢܝ ܥܰܕ ܠܴܳܐ ܐܶܗܘܶܐ܆ ܝܿܳܕܰܥ ܡܶܕܶܡ ܕܥܿܳܒܶܕ ܗܘܺܝܬ ܟܰܕ ܐܶܗܘܶܐ.

Oda 7, estrofa 10

ܡܶܛܽܠ ܗܳܢܳܐ ܚܰܢܰܢܝ ܒܰܚܢܳܢܶܗ ܣܰܓܺܝܐܴܐ܆ ܘܝܰܗ̱ܒ ܠܺܝ ܕܶܐܒܥܶܐ ܡܶܢܶܗ ܘܶܐܩܰܒܶܠ ܡܶܢ ܕܶܒܚܬܶܗ.

Oda 7, estrofa 11

ܡܶܛܽܠ ܕܗܽܘܝܽܘ ܐܺܝܬܰܘܗ̱ܝ ܕܠܴܐ ܚܒܳܠܴܐ܆ ܫܽܘܡܠܳܝܳܐ ܕܥܳܠܡܷ̈ܐ ܘܰܐܒܽܘܗܽܘܢ.

Oda 7, estrofa 12

ܝܰܗܼܒ ܠܶܗ ܕܢܶܬܚܙܶܐ ܠܐܰܝܠܶܝܢ ܕܕܺܝܠܶܗ ܐܶܢܽܘܢܿ܆ ܡܶܛܽܠ ܕܢܶܫܬܰܘܕܥܽܘܢܿ ܠܗܰܘܿ ܕܰܥܒܼܰܕ ܐܶܢܽܘܢܿ܆ ܘܰܕܠܴܐ ܢܶܣܒܪܽܘܢ ܕܡܶܢ ܢܰܦܫܗܽܘܢ ܗܘܰܘ.

Oda 7, estrofa 13

ܠܺܝܕܰܥܬܳܐ ܓܶܝܪ ܐܽܘܪܚܶܗ ܣܳܡܳܗܿ܆ ܐܰܦܬܝܳܗܿ ܘܐܱܘܪܟܳܗܿ ܘܐܱܝܬܝܳܗܿ ܥܰܠ ܟܽܠܶܗ ܫܽܘܡܠܳܝܳܐ.

Oda 7, estrofa 14

ܘܣܳܡ ܥܠܶܝܗܿ ܥܶܩ̈ܒܳܬܳܐ ܕܢܽܘܗܪܶܗ܆ ܘܗܶܠܟܰܬܼ ܡܶܢ ܒܪܺܝܫܺܝܬ ܥܕܰܡܳܐ ܠܚܰܪܬܳܐ.

Oda 7, estrofa 15

ܡܶܢܶܗ ܓܶܝܪ ܦܠܺܝܚ ܗ̱ܘܳܐ܆ ܘܰܡܢܳܚ ܗ̱ܘܳܐ ܒܰܒܪܳܐ.

Oda 7, estrofa 16

ܘܡܶܛܽܠ ܦܽܘܪܩܳܢܶܗ ܢܶܐܚܽܘܕ ܟܽܠ ܡܶܕܶܡ܆ ܘܢܶܬܺܝܕܰܥ ܡܪܰܝܡܳܐ ܒܩܰܕܺܝ̈ܫܰܘܗ̱ܝ.

Oda 7, estrofa 17

ܠܰܡܣܰܒܳܪܺܘ ܠܐܰܝܠܶܝܢ ܕܺܐܝܬ ܠܗܽܘܢܿ ܡܰܙܡܽܘܪ̈ܶܐ ܕܡܶܬܺܝܬܶܗ ܕܡܳܪܝܳܐ܆ ܕܢܶܦܩܽܘܢ ܠܽܐܘܪܥܗ ܘܢܶܙܡܪܽܘܢ ܠܶܗ܆ ܒܚܰܕܽܘܬܳܐ ܘܰܒܩܺܝܬܳܪܳܐ ܕܣܰܓܺܝܐܺܝܢ ܩܳܠܰܘ̈ܗ̱ܝ.

Oda 7, estrofa 18

ܢܺܐܙܽܠ̄ܘܢ ܩܕܳܡܰܘܗ̱ܝ ܚܰܙܳܝܷ̈ܐ܆ ܘܢܶܬܚܙܽܘܢ ܩܕܳܡܰܘܗ̱ܝ.

Oda 7, estrofa 19

ܘܰܢܫܰܒܚܽܘܢ ܠܡܳܪܝܳܐ ܒܚܽܘܒܶܗ܆ ܡܶܛܽܠ ܕܩܰܪܺܝܒ ܗ̱ܽܘܼ ܘܚܿܳܙܶܐ.

Oda 7, estrofa 20

ܘܶܐܬܬܪܺܝܡܝ ܣܶܢܶܐܬܳܐ ܡܼܶܢ ܐܰܪܥܳܐ܆ ܘܥܰܡ ܛܢܳܢܳܐ ܬܶܬܛܒܰܥܝ.

Oda 7, estrofa 21

ܐܶܬܚܰܒܠܰܬ ܠܳܗܿ ܓܶܝܪ ܠܴܐ ܝܺܕܰܥܬܳܐ܆ ܡܶܛܽܠ ܕܶܐܬܳܬ ܠܳܗܿ ܝܺܕܰܥܬܶܗ ܕܡܳܪܝܳܐ.

Oda 7, estrofa 22

ܢܙܰܡܪܽܘܢ ܐܰܝܠܶܝܢ ܕܰܡܙܰܡܪܺܝܢ ܛܰܝܒܽܘܬܶܗ ܕܡܳܪܝܳܐ ܡܪܰܝܡܳܐ܆ ܘܰܢܩܰܪܒܽܘܢ ܡܰܙܡܽܘܪ̈ܰܝܗܽܘܢܿ.

Oda 7, estrofa 23

ܘܐܰܝܟ ܝܰܘܡܳܐ ܢܶܗܘܶܐ ܠܶܒܗܽܘܢܿ܆ ܘܐܰܝܟ ܪܰܒܽܘܬ ܝܳܐܝܽܘܬܶܗ ܕܡܳܪܝܳܐ ܢܶܥܡܴ̈ܬܗܽܘܢܿ.

Oda 7, estrofa 24

ܘܠܴܐ ܢܶܗܘܶܐ ܡܶܕܶܡ ܕܢܰܦܫܳܐ܆ ܘܠܴܐ ܕܠܴܐ ܝܺܕܰܥܬܳܐ ܘܠܴܐ ܕܰܚܪܶܫ.

Oda 7, estrofa 25

ܦܽܘܡܳܐ ܓܶܝܪ ܝܰܗܼܒ ܠܰܒܪܺܝܬܶܗ܆ ܠܡܶܦܬܰܚ ܩܳܠܴܐ ܕܦܽܘܡܳܐ ܠܘܳܬܶܗ܆ ܘܠܰܡܫܰܒܳܚܽܘܬܶܗ.

Oda 7, estrofa 26

ܐܘܕܰܘ ܚܰܝܠܬܳܢܽܘܬܶܗ܆ ܘܚܰܘܰܘ ܛܰܝܒܽܘܬܶܗ. ܗܰܠܶܠܘܽܝܰܐ.

Oda 8, estrofa 1

ܦܬܰܚܘ ܦܬܰܚܘ ܠܶܒܰܘܴ̈ܬܟܽܘܢܿ ܠܰܕܝܳܨܶܗ ܕܡܳܪܝܳܐ܆ ܘܢܶܣܓܶܐ ܚܽܘܒܟܽܘܢܿ ܡܼܶܢ ܠܶܒܳܐ ܘܰܥܕܰܡܳܐ ܠܣܶܦܘܴ̈ܬܳܐ.

Oda 8, estrofa 2

ܠܡܰܝܬܳܝܽܘ ܦܺܐܪ̈ܶܐ ܠܡܳܪܝܳܐ ܚܰܝܷ̈ܐ ܩܰܕܺܝ̈ܫܶܐ܆ ܘܠܰܡܡܰܠܳܠܽܘ ܒܥܺܝܪܽܘܬܳܐ ܒܢܽܘܗܪܶܗ.

Oda 8, estrofa 3

ܩܽܘܡܘ ܘܶܐܬܩܰܝܰܡܘ܆ ܗܳܢܽܘܢ ܕܒܰܙܒܰܢ ܐܶܬܡܰܟܰܟܘ.

Oda 8, estrofa 4

ܗܳܢܽܘܢܿ ܕܰܗܘܰܘ ܒܫܶܠܝܳܐ ܡܰܠܶܠܘ܆ ܕܶܐܬܦܬܰܚ ܦܽܘܡܟܽܘܢܿ.

Oda 8, estrofa 5

...

Oda 8, estrofa 6

ܝܰܡܺܝܢܶܗ ܓܶܝܪ ܕܡܳܪܝܳܐ ܥܰܡܟܽܘܢ ܗ̱ܺܝܼ܆ ܘܗܽܘܼ ܗܴܿܘܶܐ ܠܟܽܘܢ ܡܥܰܕܪܳܢܳܐ.

Oda 8, estrofa 7

ܘܶܐܬܛܰܝܰܒ ܠܟܽܘܢ ܫܠܳܡܳܐ܆ ܡܶܢ ܩܕܳܡ ܕܢܶܗܘܶܐ ܩܪܳܒܟܽܘܢܿ.

Oda 8, estrofa 8

ܫܡܰܥܘ ܦܶܬܓܳܡܳܐ ܕܰܫܪܳܪܳܐ܆ ܘܩܰܒܶܠܘ ܝܺܕܰܥܬܶܗ ܕܰܡܪܰܝܡܳܐ.

Oda 8, estrofa 9

ܠܴܐ ܢܶܕܰܥ ܒܶܣܪܟܽܘܢܿ ܡܶܕܶܡ ܕܳܐܡܿܰܪ ܐ̱ܢܳܐ ܠܟܽܘܢܿ܆ ܐܳܦ ܠܴܐ ܠܒܽܘܫܟܽܘܢܿ ܡܶܕܶܡ ܕܰܡܚܰܘܶܐ ܐ̱ܢܳܐ ܠܟܽܘܢܿ.

Oda 8, estrofa 10

ܛܰܪܘ ܐ̱ܪܳܙ ܗܳܢܽܘܢܿ ܕܡܶܬܢܰܛܪܺܝܢ ܒܶܗ܆ ...

Oda 8, estrofa 11

ܛܰܪܘ ܗܰܝܡܳܢܽܘܬܝ ܗܳܢܽܘܢܿ ܕܡܶܬܢܰܛܪܺܝܢ ܒܳܗܿ.

Oda 8, estrofa 12

ܘܕܰܥܘ ܝܺܕܰܥܬܝ ܗܳܢܽܘܢܿ ܕܒܰܫܪܳܪܳܐ ܝܳܕܥܺܝܢ ܠܺܝ܆

Oda 8, estrofa 13

ܪܽܘܚܡܽܘܢܝ ܒܚܽܘܒܳܐ ܐܰܝܠܶܝܢ ܕܪܳܚܿܡܺܝܢ.

Oda 8, estrofa 14

ܠܴܐ ܓܶܝܪ ܡܰܗܦܶܟ ܐ̱ܢܳܐ ܠܗܽܘܢܿ. ...

Oda 8, estrofa 15

ܘܡܼܶܢ ܩܕܳܡ (ܕܠܴܐ ܢܶܗܘܽܘܿܢ)܆ ܐܶܣܬܰܟܼܠܶܬ ܐܶܢܽܘܢܿ܆ ܘܦܰܪ̈ܨܽܘܦܰܝܗܽܘܢܿ ܐܶܢܳܐ ܛܶܒܿܥܶܬ ܐܶܢܽܘܢܿ.

Oda 8, estrofa 16

ܐܶܢܳܐ ܐܰܬܩܢܶܬ ܗܰܕܳܡܰܝ̈ܗܽܘܢܿ܆ ܘܰܕܬܕܰܝܴ̈ܐ ܕܺܝܠܝ ܛܰܝܿܒܶܬ ܠܗܽܘܢܿ܆ ܕܢܶܫܬܽܘܢ ܚܰܠܒܳܐ ܩܰܕܺܝܫܳܐ ܕܺܝܠܝ ܕܢܺܐܚܽܘܢ ܒܶܗ.

Oda 8, estrofa 17

ܐܶܨܛܒܺܝܬ ܒܗܽܘܢܿ܆ ܘܠܴܐ ܒܳܗܶܬ ܐ̱ܢܳܐ ܒܗܽܘܢ݂ܿ

Oda 8, estrofa 18

ܕܺܝܠܝ ܓܶܝܪ ܥܒܿܳܕܳܐ ܐܺܝܬܰܝܗܘܽܢܿ܆ ܘܚܰܝܠܴܳܐ ܕܡܰܚܫ̈ܒܳܬܝ.

Oda 8, estrofa 19

ܡܰܢܽܘ ܗܳܟܺܝܠ ܢܩܽܘܡ ܠܽܘܩܒܰܠ ܥܒܳܕܝ܆ ܐܰܘ ܡܰܢܽܘ ܕܠܴܐ ܡܶܬܛܦܽܝܣ ܠܗܽܘܢܿ.

Oda 8, estrofa 20

ܐܶܢܳܐ ܡܰܕܥܳܐ ܘܠܶܒܳܐ ܨܒܿܺܝܬ ܘܓܶܒܿܠܶܬ܆ ܘܕܺܝܠܝ ܐܺܝܬܰܝܗܽܘܢܿ܆ ܘܡܼܶܢ ܝܰܡܺܝܢܳܐ ܕܺܝܠܝ ܣܳܡܿܶܬ ܠܰܓ̈ܒܰܝ.

Oda 8, estrofa 21

ܘܐܳܙܠܴܐ ܩܽܘܕܡܰܝܗܽܘܢܿ ܙܰܕܺܝܩܽܘܬܝ܆ ܘܠܴܐ ܢܶܫܬܰܘܚܕܽܘܢ ܡܼܶܢ ܫܶܡܝ܆ ܡܶܛܽܠ ܕܥܰܡܗܽܘܢܿ ܗ̱ܽܘܼ.

Oda 8, estrofa 22

ܒܥܰܘ ܐܱܣܓܰܘ܆ .ܘܩܰܘܰܘ ܒܪܶܚܡܬܶܗ ܕܡܳܪܝܳܐ

Oda 8, estrofa 23

ܘܚܰܒܺܝ̈ܒܶܐ ܒܚܰܒܺܝܒܳܐ܆ ܘܗܳܢܽܘܢܿ ܕܰܢܛܺܝܪܺܝܢ ܒܗܰܘܿ ܕܚܼܳܝܶܐ܆ ܘܰܦܪ̈ܺܝܩܶܐ ܒܗܰܘܿ ܕܶܐܬܦܶܪܼܩ.

Oda 8, estrofa 24

ܘܰܕܠܴܐ ܚܒܿܳܠܴܐ ܬܶܫܬܟܚܽܘܢ ܒܟܽܠܗܽܘܢ ܥܳܠ̈ܡܶܐ܆ ܠܫܡܗ ܕܐܒܟܘܢܿ. ܗܰܠܶܠܘܽܝܰܐ.

Oda 9, estrofa 1

ܦܬܰܚ ܐܶܕܢܰܝ̈ܟܽܘܢܿ܆ ܘܶܐܡܰܠܶܠ ܠܟܽܘܢܿ.

Oda 9, estrofa 2

ܗܰܒ ܠܺܝ ܢܰܦܫܟܽܘܢܿ܆ ܕܳܐܦ ܐܶܢܳܐ ܐܶܬܶܠ ܠܟܽܘܢ ܢܰܦܫܝ.

Oda 9, estrofa 3

ܦܶܬܓܳܡܶܗ ܕܡܳܪܝܳܐ ܘܨܶܒܝܳܢܱ̈ܘܗ̱ܝ܆ ܡܰܚܫܰܒܬܳܐ ܩܰܕܺܝܫܬܳܐ ܕܶܐܬܚܰܫܰܒ ܥܰܠ ܡܫܺܝܚܶܗ.

Oda 9, estrofa 4

ܒܨܶܒܝܳܢܶܗ ܓܶܝܪ ܕܡܳܪܝܳܐ ܚܰܝܰܝ̈ܟܽܘܢܿ ܐܺܝܬܰܝܗܽܘܢܿ܆ ܘܬܰܪܥܺܝܬܶܗ ܚܰܝܷ̈ܐ ܕܰܠܥܳܠܰܡ܆ ܘܰܕܠܴܐ ܚܒܳܠܴܐ ܐܺܝܬܰܘܗ̱ܝ ܫܽܘܡܠܳܝܟܽܘܢܿ.

Oda 9, estrofa 5

ܥܬܰܪܘ ܒܐܱܠܳܗܳܐ ܐܰܒܳܐ܆ ܘܩܰܒܶܠܘ ܬܰܪܥܺܝܬܶܗ ܕܰܡܪܰܝܡܳܐ܆ ܐܶܬܚܰܝܰܠܘ ܘܐܶܬܦܰܪܩܘ ܒܛܰܝܒܽܘܬܶܗ.

Oda 9, estrofa 6

ܡܣܰܒܰܪ ܐ̱ܢܳܐ ܓܶܝܪ ܫܠܳܡܳܐ ܠܟܽܘܢܿ ܠܰܚܣܰܘ̈ܗ̱ܝ܆ ܕܟܽܠܗܽܘܢ ܐܰܝܠܶܝܢ ܕܫܳܡܥܺܝܢ ܠܴܐ ܢܶܦܠܽܘܢ ܒܰܩܪܳܒܳܐ.

Oda 9, estrofa 7

ܘܐܰܝܠܶܝܢ ܬܽܘܒ ܕܝܰܕܥܽܘܗ̱ܝ ܠܴܐ ܢܺܐܒܕܽܘܢ܆ ܘܰܕܗܳܢܽܘܢܿ ܕܢܶܣܒܽܘܢ ܠܴܐ ܢܶܒܗܬܽܘܢܿ.

Oda 9, estrofa 8

ܟܠܺܝܠܴܐ ܕܰܠܥܳܠܰܡ ܫܪܳܪܳܐ ܐܺܝܬܰܘܗ̱ܝ܆ ܛܽܘܒܰܝܗܽܘܢܿ ܠܐܰܝܠܶܝܢ ܕܣܿܳܝܡܺܝܢ ܠܶܗ ܒܪܺܝܫܗܽܘܢܿ.

Oda 9, estrofa 9

ܟܺܐܦܳܐ ܝܰܩܺܝܪܰܬ ܕܡܰܝ̈ܳܐ܆ ܘܰܩܪ̈ܳܒܶܐ ܓܶܝܪ ܡܶܛܽܠ ܟܠܺܝܠܴܐ ܗܘܰܘ.

Oda 9, estrofa 10

ܘܰܢܣܰܒܬܶܗ ܙܰܕܺܝܩܽܘܬܳܐ܆ ܘܰܠܟܽܘܢܿ ܝܰܗ̱ܒܬܶܗ.

Oda 9, estrofa 11

ܣܺܝܡܘ ܟܠܺܝܠܴܐ ܒܰܩܝܳܡܶܗ ܫܰܪܺܝܪܳܐ ܕܡܳܪܝܳܐ܆ ܘܟܽܠܗܽܘܢ ܐܰܝܠܶܝܢ ܕܰܙܟܰܘ ܢܶܬܟܰܬܒܽܘܢ ܒܰܟܬܳܒܶܗ.

Oda 9, estrofa 12

ܟܬܳܒܗܽܘܢܿ ܓܶܝܪ ܙܳܟܽܘܬܳܐ ܗ̱ܝܼ ܕܰܠܟܽܘܢܿ܆ ܘܚܳܙܝܳܐ ܠܟܽܘܢܿ ܩܕܳܡܶܝܗܿ ܘܨܳܒܝܳܐ ܕܬܶܬܦܰܪܩܽܘܢ. ܗܰܠܶܠܘܽܝܰܐ.

Oda 10, estrofa 1

ܬܰܪܶܨ ܦܽܘܡܝ ܡܳܪܝܳܐ ܒܡܶܠܬܶܗ܆ ܘܰܦܬܼܰܚ ܠܶܒܝ ܒܢܽܘܗܪܶܗ.

Oda 10, estrofa 2

ܘܐܷܥܡܰܪ ܒܺܝ ܚܰܝܰܘ̈ܗ̱ܝ ܕܠܴܐ ܡܰܘܬܳܐ܆ ܘܝܰܗ̱ܒ ܠܺܝ ܕܶܐܡܰܠܶܠ ܦܺܐܪܳܐ ܕܰܫܠܳܡܶܗ.

Oda 10, estrofa 3

ܠܡܰܦܢܳܝܽܘ ܢܰܦܫܴ̈ܬܳܐ ܕܐܱܝܠܶܝܢ ܕܨܳܒܶܝܢ ܠܡܶܐܬܴܐ ܠܘܳܬܶܗ܆ ܘܰܠܡܶܫܒܳܐ ܫܒܺܝܬܳܐ ܛܳܒܬܳܐ ܠܚܺܐܪܽܘܬܳܐ.

Oda 10, estrofa 4

ܐܶܬܚܱܿܝܠܶܬ ܘܐܷܬܥܰܫܢܶܬ ܘܰܫܒܺܝܬ ܠܥܳܠܡܳܐ܆ ܘܰܗܼܘܳܬ ܠܝܻ ܠܬܶܫܒܽܘܚܬܶܗ ܕܰܡܪܰܝܡܳܐ ܘܕܰܐܠܳܗܳܐ ܐܳܒܝ.

Oda 10, estrofa 5

ܘܐܷܬܟܰܢܰܫܘ ܐܰܟܚܰܕ ܥܰܡ̈ܡܶܐ ܕܰܡܒܕܪܺܝܢ ܗ̱ܘܰܘ܆ ܘܐܷܢܐ ܠܴܐ ܐܶܬܛܰܡܿܐܷܬ ܒܚܰܘ̈ܒܰܝ܆ ܡܶܛܽܠ ܕܰܐܘܕܺܝܘ ܠܻܝ ܒܰܡܪ̈ܰܘܡܶܐ.

Oda 10, estrofa 6

ܘܐܷܬܬܣܺܝ̈ܡܝ ܥܶܩ̈ܒܳܬܳܐ ܕܢܽܘܗܪܳܐ ܥܰܠ ܠܶܒܗܽܘܢܿ܆ ܘܗܰܠܶܟܘ ܒܚܰܝܱ̈ܝ ܘܐܷܬܦܪܶܩܘ܆ ܘܰܗܘܰܘ ܥܰܡܝ ܠܥܳܠܰܡܥܳܠܡܺܝܢ. ܗܰܠܶܠܘܽܝܰܐ.

Oda 11, estrofa 1

ܐܶܬܓܙܰܪ ܠܶܒܝ ܘܶܐܬܚܙܺܝ ܥܽܘܦܳܝܶܗ܆ ܘܺܝܥܼܳܬ ܒܶܗ ܛܰܝܒܽܘܬܳܐ܆ ܘܰܥܒܰܕ ܦܺܐܪ̈ܶܐ ܠܡܳܪܝܳܐ.

Oda 11, estrofa 2

ܡܪܰܝܡܳܐ ܓܶܝܪ ܓܰܙܪܰܢܝ ܒܪܽܘܚܶܗ ܩܰܕܺܝܫܳܐ܆ ܘܰܓܠܼܳܐ ܠܘܳܬܶܗ ܟܽܘ̈ܠܝܳܬܝ܆ ܘܰܡܠܳܢܝ ܡܼܶܢ ܚܽܘܒܶܗ.

Oda 11, estrofa 3

ܘܰܗܘܳܬ ܠܺܝ ܓܙܽܘܪܬܶܗ ܠܦܽܘܪܩܳܢܳܐ܆ (ܘܪܶܗܿܛܶܬ ܒܽܐܘܪܚܳܐ ܒܰܫܠܳܡܶܗ܆ ܒܽܐܘܪܚܳܐ ܕܰܫܪܳܪܳܐ.)

Oda 11, estrofa 4

ܡܼܶܢ ܪܺܝܫܺܝܬܳܐ ܘܰܥܕܰܡܳܐ ܠܰܐܚܪܳܝܬܳܐ܆ ܢܶܣܒܶܬ ܝܺܕܰܥܬܶܗ.

Oda 11, estrofa 5

ܘܐܷܫܬܰܪܪܶܬ ܥܰܠ (ܫܽܘܥܳܐ ܕܰܫܪܳܪܳܐ)܆ ܐܰܝܟܳܐ ܕܗܽܘ ܐܰܬܩܢܰܢܝ.

Oda 11, estrofa 6

ܘܡܰܝ̈ܳܐ ܡܱ̈ܠܳܠܷܐ ܩܪܶܒܘ ܠܣܶܦ̈ܘܳܬܝ܆ (ܡܼܶܢ ܡܰܒܽܘܥܶܗ ܕܡܳܪܝܳܐ ܕܠܴܐ ܚܣܳܡ.

Oda 11, estrofa 7

ܘܶܐܫܿܬܺܝܬ ܘܰܪܘܺܝܬ܆ ܡܼܶܢ ܡܰܝ̈ܳܐ ܚܰܝܷ̈ܐ ܕܠܴܐ ܡܿܳܝܬܺܝܢ.

Oda 11, estrofa 8

ܘܪܳܘܝܽܘܬܝ ܠܴܐ ܗܘܳܬ ܕܠܴܐ ܝܺܕܰܥܬܳܐ܆ ܐܶܠܴܐ ܫܶܒܩܶܬ ܣܪ̈ܺܝܩܳܬܳܐ.

Oda 11, estrofa 9

ܘܶܐܬܦܢܺܝܬ ܠܘܳܬ ܡܪܰܝܡܳܐ ܐܰܠܳܗܝ܆ ܘܥܶܬܪܶܬ ܒܡܰܘܗܰܒܬܶܗ.

Oda 11, estrofa 10

ܘܫܶܒܩܶܬ ܠܫܳܛܝܽܘܬܳܐ ܫܰܕܝܳܐ ܥܰܠ ܐܰܪܥܳܐ܆ ܘܰܫܠܰܚܬܳܗܿ ܘܰܫܕܺܝܬܳܗܿ ܡܶܢܝ.

Oda 11, estrofa 11

ܘܡܳܪܝܳܐ ܚܰܕܬܰܢܝ ܒܰܠܒܽܘܫܶܗ܆ ܘܰܩܢܳܢܝ ܒܢܽܘܗܪܶܗ.

Oda 11, estrofa 12

(ܘܡܼܶܢ ܠܥܶܠ ܐܰܢܺܚܰܝܢܝ ܕܠܴܐ ܚܒܴܿܠ܆ ܘܰܗܘܺܝܬ ܐܰܝܟ ܐܰܪܥܳܐ ܕܫܳܘܚܳܐ ܘܪܳܘܙܳܐ ܒܦܺܐܪ̈ܶܝܗܿ.

Oda 11, estrofa 13

ܘܡܳܪܝܳܐ ܐܰܝܟ ܫܶܡܫܳܐ܆ ܥܰܠ ܐܰܦܶܝ̈ܗܿ ܕܰܐܪܥܳܐ.

Oda 11, estrofa 14

ܥܰܝ̈ܢܰܝ ܐܰܢܗܼܰܪ܆ ܘܦܰܪܨܽܘܦܝ ܩܼܰܒܶܠ ܛܰܐܠܴܐ.

Oda 11, estrofa 15

ܘܶܐܬܒܰܣܡܰܬ ܢܶܫܡܰܬܝ܆ (ܒܪܺܝܚܶܗ ܒܰܣܺܝܡܳܐ) ܕܡܳܪܝܳܐ.

Oda 11, estrofa 16

ܘܰܐܘܒܠܳܢܝ ܠܦܰܪܕܰܝܣܶܗ܆ ܐܰܝܟܳܐ ܕܥܽܘܬܪܳܐ ܕܒܽܘܣܳܡܶܗ ܕܡܳܪܝܳܐ.

Oda 11, estrofa 17

ܘܣܶܓܕܶܬ ܠܡܳܪܝܳܐ ܡܶܛܽܠ ܬܶܫܒܽܘܚܬܶܗ.

Oda 11, estrofa 18

ܘܐܷܡܪܶܬ ܕܛܽܘܒܰܝܗܽܘܢܿ ܡܳܪܝܳܐ܆ ܠܐܰܝܠܶܝܢ ܕܳܢܨܺܝܒܺܝܢ ܒܰܐܪܥܳܟ܆ ܘܗܳܢܽܘܢܿ ܕܺܐܝܬ ܠܗܽܘܢܿ ܐܰܬܪܳܐ ܒܦܰܪܕܰܝܣܳܟ.

Oda 11, estrofa 19

ܘܝܴܿܥܶܝܢ ܒܡܰܘܥܺܝܬܳܐ ܕܺܐܝ̈ܠܳܢܰܝܟ܆ ܘܫܰܢܺܝܘ ܡܼܶܢ ܚܶܫܽܘܟܳܐ ܫܰܦܺܝܪܺܝܢ܆

Oda 11, estrofa 20

... ܕܥܴܿܒܕܶܝܢ ܥܒܴ̈ܕܶܐ ܛܳܒܷ̈ܐ܆ (ܘܗܳܦܟܻܝܢ ܡܼܶܢ ܒܺܝܫܽܘܬܳܐ ܠܒܰܣܺܝܡܽܘܬܳܐ ܕܺܝܠܳܟ).

Oda 11, estrofa 21

(ܘܐܱܗܶܦܟܘ ܡܪܳܪܳܐ ܕܐܻܝ̈ܠܳܢܶܐ ܡܶܢܗܽܘܢܿ܆ ܡܳܐ ܕܶܐܬܢܨܰܒܘ ܒܰܐܪܥܳܐ ܕܺܝܠܳܟ)܆

Oda 11, estrofa 22

... ܘܕܽܘܟܪܳܢܳܐ ܕܰܠܥܳܠܰܡ ܕܥܰܒܼܕܰܝ̈ܟ ܡܗܰܝ̈ܡܢܶܐ.

Oda 11, estrofa 23

ܣܰܓܺܝ ܗ̱ܽܘܼ ܓܶܝܪ ܐܰܬܪܳܐ ܒܦܰܪܕܰܝܣܳܟ܆ ܘܠܰܝܬ ܒܶܗ ܡܶܕܶܡ ܕܰܒܛܺܝܠ܆ ܐܶܠܴܐ ܟܽܠܡܶܕܶܡ ܡܠܷܐ ܦܺܐܪ̈ܶܐ.

Oda 11, estrofa 24

(ܫܽܘܒܚܳܐ ܠܳܟ ܐܰܠܳܗܐ ܒܽܘܣܳܡܳܐ ܕܰܒܦܰܪܕܰܝܣܳܐ ܕܰܠܥܳܠܰܡ). ܗܰܠܶܠܘܽܝܰܐ.

Oda 12, estrofa 1

ܡܠܼܳܢܝ ܦܶܬܓܳܡ̈ܶܐ ܕܰܫܪܳܪܳܐ܆ ܡܶܛܽܠ ܕܐܷܡܰܠܶܠ ܠܶܗ.

Oda 12, estrofa 2

ܘܐܰܝܟ ܪܳܕܝܳܐ ܕܡܰܝܴ̈ܐ ܪܳܕܶܐ ܫܪܳܪܳܐ ܡܶܢ ܦܽܘܡܝ܆ ܘܣܶܦܘܴ̈ܬܝ ܚܰܘܺܝ ܦܺܐܪ̈ܰܘܗ̱ܝ.

Oda 12, estrofa 3

ܘܰܐܣܓܺܝ ܒܺܝ ܝܺܕܰܥܬܶܗ܆ ܡܶܛܽܠ ܕܦܽܘܡܶܗ ܕܡܳܪܝܳܐ ܦܶܬܓܳܡܳܐ ܗ̱ܽܘܼ ܫܰܪܺܝܪܳܐ܆ ܘܬܰܪܥܳܐ ܕܢܽܘܗܪܶܗ.

Oda 12, estrofa 4

ܘܝܰܗܒܶܗ ܡܪܰܝܡܳܐ ܠܥܴ̈ܠܡܰܘܗ̱ܝ܆ ܡܬܰܪ̈ܓܡܳܢܶܐ ܕܝܳܐܝܽܘܬܼܳܐ ܕܺܝܠܶܗ܆ ܘܰܡܬܰܢ̈ܝܳܢܶܐ ܕܬܶܫܒܽܘܚܬܶܗ܆ ܘܡܰܘ̈ܕܝܳܢܶܐ ܕܡܰܚܫܰܒܬܶܗ܆ ܘܰܡܣܰܒܪ̈ܳܢܶܐ ܕܬܰܪܥܺܝܬܶܗ܆ ܘܰܡܢܰܟ̈ܦܳܢܶܐ ܕܰܥܒܴ̈ܕܰܘܗ̱ܝ.

Oda 12, estrofa 5

ܩܰܠܻܝܠܺܘܬܶܗ ܓܶܝܪ ܕܦܶܬܓܳܡܳܐ ܕܠܴܳܐ ܬܽܘܢܳܝܳܐ ܐܺܝܬܶܝܗܿ܆ ܘܐܱܝܟ ܬܽܘܢܳܝܶܗ ܗܳܟܰܢܳܐ ܐܶܦ ܩܰܠܺܝܠܽܘܬܶܗ ܘܚܰܪܺܝܦܽܘܬܶܗ܆ ܘܰܕܠܴܐ ܣܽܘܝܳܟܳܐ ܐܺܝܬܶܝܗܿ ܗܶܠܰܟܬܶܗ.

Oda 12, estrofa 6

ܘܠܴܐ ܡܬܽܘܡ ܢܿܳܦܶܠ ܐܶܠܴܐ ܡܩܳܡ ܗ̱ܽܘܼ ܩܴܿܐܷܡ܆ ܘܠܴܐ ܢܷܿܕܰܥ ܡܰܚܬܶܗ ܐܳܦܠܴܐ ܐܽܘܪܚܶܗ.

Oda 12, estrofa 7

ܐܰܝܟ ܥܒܿܳܕܶܗ ܓܶܝܪ ܗܳܟܰܢܳܐ ܣܽܘܟܳܝܶܗ܆ ܢܽܘܗܪܳܐ ܓܶܝܪ ܘܕܶܢܚܳܗܿ ܕܰܡܚܫܰܒܬܳܐ ܐܺܝܬܘܗ̱ܝ.

Oda 12, estrofa 8

ܘܥܳܠܡܷ̈ܐ ܒܶܗ ܡܰܠܶܠܘ ܚܰܕ ܠܚܰܕ܆ ܘܰܗܘܰܘ ܒܡܶܠܬܳܐ ܗܳܢܽܘܢܿ ܕܫܰܬܺܝܩܺܝܢ ܗ̱ܘܰܘ.

Oda 12, estrofa 9

ܘܡܶܢܶܗ ܗܘܳܬ ܪܳܚܡܽܘܬܳܐ ܘܫܰܘܝܽܘܬܳܐ܆ ܘܡܰܠܶܠܘ ܚܰܕ ܠܘܳܬ ܚܰܕ ܡܶܕܶܡ ܕܺܐܝܬ ܗ̱ܘܳܐ ܠܗܽܘܢܿ.

Oda 12, estrofa 10

ܘܶܐܙܕܩܶܬܘ ܡܼܶܢ ܦܶܬܓܳܡܳܐ܆ ܘܺܝܕܰܥܘ ܠܗܰܘܿ ܕܰܥܒܰܕ ܐܶܢܽܘܢܿ܆ ܒܰܕ ܗܘܰܘ ܒܫܰܘܝܽܘܬܳܐ.

Oda 12, estrofa 11

ܡܶܛܽܠ ܕܡܰܠܶܠ ܠܗܽܘܢܿ ܦܽܘܡܶܗ ܕܰܡܪܰܝܡܳܐ܆ ܘܪܶܗܼܛܰܬ ܒܺܐܝܕܶܗ ܡܦܰܫܩܳܢܽܘܬܶܗ.

Oda 12, estrofa 12

ܡܰܫܟܢܳܐ ܓܶܝܪ ܕܦܶܬܓܳܡܳܐ ܒܰܪ ܐ̱ܢܳܫܰܐ ܗ̱ܘܼ܆ ܘܰܫܪܳܪܶܗ ܚܽܘܒܰܐ ܗ̱ܘܼ.

Oda 12, estrofa 13

ܛܽܘܒܰܝܗܽܘܢܿ ܠܐܰܝܠܶܝܢ ܕܰܒܝܰܕ ܗܳܢܳܐ ܐܶܫܬܰܘܕܰܥܘ ܟܽܠ ܡܶܕܶܡ܆ ܘܝܺܕܰܥܘ ܠܡܳܪܝܳܐ ܒܰܫܪܳܪܶܗ. ܗܰܠܶܠܘܽܝܰܐ.

Oda 13, estrofa 1

ܗܳܐ ܡܰܚܙܺܝܬܰܢ ܡܳܪܝܰܐ ܗ̱ܘܼ܆ ܦܬܰܚܘ ܥܰܝ̈ܢܶܐ ܘܰܚܙܰܘ ܐܶܢܶܝܢ ܒܶܗ.

Oda 13, estrofa 2

ܘܝܺܠܰܦܘ ܐܰܝܟܳܐ ܐܺܝܬܰܝܗܶܝܢ ܐܰܦܰܝ̈ܟܽܘܢܿ܆ ܘܣܰܒܰܪܘ ܬܶܫܒ̈ܚܳܬܳܐ ܠܪܽܘܚܶܗ.

Oda 13, estrofa 3

ܘܫܰܘܰܘ ܨܝ̈ܕܬܐ ܡܼܶܢ ܐܰܦܰܝ̈ܟܽܘܢ܆ ܘܰܪܚܰܡܘ ܩܰܕܺܝܫܽܘܬܶܗ ܘܠܘܒܘܫܘܗܿ.

Oda 13, estrofa 4

ܘܬܶܗܘܽܘܢ ܕܠܴܐ ܡܽܘܡܳܐ ܒܟܽܠܙܒܰܢ ܠܘܳܬܶܗ. ܗܰܠܶܠܘܽܝܰܐ

Oda 14, estrofa 1

ܐܰܝܟ ܥܰܝ̈ܢܰܘܗ̱ܝ ܕܰܒܪܳܐ ܥܰܠ ܐܰܒܽܘܗ̱ܝ܆ ܗܳܟܰܢܳܐ ܥܰܝ̈ܢܰܝ ܡܳܪܝܳܐ ܒܟܽܠܙܒܰܢ ܠܘܳܬܳܟ ܐܺܝܬܰܝܗܶܝܢ.

Oda 14, estrofa 2

ܡܶܛܽܠ ܕܰܠܘܳܬܳܟ ܐܶܢܽܘܢܿ ܬܕܰܝ̈ ܘܦܽܘܢܳܩܝ.

Oda 14, estrofa 3

ܠܴܐ ܬܰܣܛܶܐ ܪ̈ܰܚܡܰܝܟ ܡܶܢܝ ܡܳܪܝܳܐ܆ ܘܠܴܐ ܬܶܣܰܒ ܡܶܢܝ ܒܰܣܺܝܡܽܘܬܳܟ.

Oda 14, estrofa 4

ܐܰܘܫܶܛ ܠܺܝ ܡܳܪܝ ܒܟܽܠܙܒܰܢ ܝܰܡܺܝܢܳܟ܆ ܘܰܡܕܰܒܪܳܢܳܐ ܗܘܺܝ ܠܺܝ ܥܕܰܡܳܐ ܠܚܰܪܬܳܐ ܥܰܠ ܨܶܒܝܳܢܳܟ.

Oda 14, estrofa 5

ܐܶܫܦܰܪ ܩܕܳܡܰܝܟ ܡܶܛܽܠ ܬܶܫܒܽܘܚܬܳܟ܆ ܘܡܶܛܽܠ ܫܡܳܟ ܐܶܬܦܪܶܩ ܡܼܶܢ ܒܺܝܫܳܐ.

Oda 14, estrofa 6

ܘܢܺܝܚܽܘܬܳܟ ܡܳܪܝܳܐ ܬܩܰܘܶܐ ܠܘܳܬܝ܆ ܘܦܺܐܪ̈ܰܘܗ̱ܝ ܕܚܽܘܒܳܟ.

Oda 14, estrofa 7

ܐܰܠܶܦܰܝܢܝ ܙܡܺܝܪ̈ܳܬܳܐ ܕܰܫܪܳܪܳܟ܆ ܕܶܐܥܒܶܕ ܒܳܟ ܦܺܐܪ̈ܶܐ.

Oda 14, estrofa 8

ܘܩܺܝܬܳܪܳܐ ܕܪܽܘܚܳܟ ܩܰܕܺܝܫܳܐ ܦܬܰܚ ܠܻܝ܆ ܕܰܒܟܽܠ ܩܺܝ̈ܢܳܢ ܐܶܫܰܒܚܳܟ ܡܳܪܝܳܐ.

Oda 14, estrofa 9

ܘܐܰܝܟ ܣܽܘܓܳܐܐ ܕܪ̈ܰܚܡܰܝܟ ܗܳܟܰܢܳܐ ܬܶܬܶܠ ܠܺܝ܆ ܘܣܰܪܗܶܒ ܠܡܶܬܰܠ ܫܶܐܠܴ̈ܬܰܢ.

Oda 14, estrofa 10

ܘܰܐܢ̱ܬ ܗ̱ܽܘܼ ܡܨܶܐ ܟܽܠܗܶܝܢ ܚܰܫ̈ܚܳܬܰܢ. ܗܰܠܶܠܘܽܝܰܐ.

Oda 15, estrofa 1

ܐܰܟܙܢܳܐ ܕܫܶܡܫܳܐ ܚܰܕܽܘܬܰܐ ܗ̱ܘܼ ܠܐܰܝܠܶܝܢ ܕܒܿܳܥܶܝܢ ܝܰܘܡܶܗ܆ ܗܳܟܰܢܳܐ ܚܰܕܽܘܬܝ ܡܳܪܝ ܗ̱ܽܘܼ.

Oda 15, estrofa 2

ܡܶܛܽܠ ܕܗܽܘܝܽܘ ܫܶܡܫܝ܆ ܘܙܱ̈ܠܺܝܩܰܘܗ̱ܝ ܐܰܩܺܝܡܽܘܢܝ܆ ܘܢܽܘܗܪܶܗ ܫܪܳܐ ܟܽܠ ܚܶܫܽܘܟܳܐ ܡܼܶܢ ܐܰܦܱ̈ܝ.

Oda 15, estrofa 3

ܩܢܺܝܬ ܒܶܗ ܥܰܝܢܷ̈ܐ܆ ܘܰܚܙܺܝܬ ܠܝܰܘܡܶܗ ܩܰܕܺܝܫܳܐ.

Oda 15, estrofa 4

ܗܘܱ̈ܝ ܠܺܝ ܐܶܕܢܷ̈ܐ܆ ܘܫܶܡܿܥܶܬ ܠܰܫܪܳܪܶܗ.

Oda 15, estrofa 5

ܗܘܳܬ ܠܺܝ ܡܰܚܫܰܒܬܳܐ ܕܺܝܕܰܥܬܳܐ܆ ܘܐܶܬܦܱܿܢܩܶܬ ܒܺܐܝܕܶܗ.

Oda 15, estrofa 6

ܐܽܘܪܚܳܐ ܕܛܳܥܝܽܘܬܳܐ ܫܶܒܿܩܶܬ܆ ܘܐܶܙܷܿܠ̱ܬ ܠܘܳܬܶܗ ܘܢܶܣܿܒܶܬ ܦܽܘܪܩܳܢܐ ܡܶܢܶܗ ܕܠܴܐ ܚܣܳܡܳܐ.

Oda 15, estrofa 7

ܘܐܰܝܟ ܡܰܘܗܰܒܬܶܗ ܝܰܗ̱ܒܼ ܠܺܝ܆ ܘܐܰܝܟ ܪܰܒܼܽܘܬ ܝܳܐܝܽܘܬܶܗ ܥܰܒܕܰܢܝ.

Oda 15, estrofa 8

ܠܶܒܿܫܶܬ ܠܠܴܐ ܚܒܳܠܴܐ ܒܝܰܕ ܫܡܶܗ܆ ܘܫܶܠܚܶܬ ܠܰܚܒܳܠܴܐ ܒܛܰܝܒܽܘܬܶܗ.

Oda 15, estrofa 9

ܡܰܘܬܳܐ ܐܶܬܚܰܒܰܠ ܡܼܶܢ ܩܕܳܡ ܦܰܪܨܽܘܦܝ܆ ܘܰܫܝܽܘܠ ܐܶܬܒܰܛܠܱܬ ܒܡܶܠܰܬܝ.

Oda 15, estrofa 10

ܘܰܣܠܼܶܩ ܒܰܐܪܥܶܗ ܕܡܳܪܝܳܐ ܚܰܝܷ̈ܐ ܕܠܴܐ ܡܰܘܬܳܐ܆ ܘܐܶܬܺܝܕܰܥܘ ܠܡܰܗܰܝܡ̈ܢܰܘܗ̱ܝ܆ ܘܐܶܬܺܝܗܶܒܘ ܕܠܴܐ ܚܽܘܣܪܳܢܳܐ ܠܟܽܠܗܽܘܢܿ ܐܰܝܠܶܝܢ ܕܰܬܟܺܝܠܺܝܢ ܥܠܰܘܗܝ. ܗܰܠܶܠܘܽܝܰܐ.

Oda 16, estrofa 1

ܐܰܟܙܢܳܐ ܕܰܒܥܴܿܕܶܗ ܕܐܱܟܳܪܳܐ ܩܶܩܢܳܐ ܗ̱ܝܼ܆ ܘܰܥܒܴܿܕܶܗ ܕܩܽܘܒܰܪܢܺܝܛܰܐ ܓܪܳܪܳܗܿ ܕܐܷܠܦܳܐ܆ ܗܳܟܰܢܳܐ ܐܳܦ ܥܒܿܳܕܝ ܡܰܙܡܽܘܪܰܐ ܗ̱ܘܼ ܕܡܳܪܝܳܐ ܒܬܶܫܒ̈ܚܳܬܶܗ.

Oda 16, estrofa 2

ܐܽܘܡܳܢܽܘܬܝ ܘܦܽܘܠܚܳܢܝ ܒܬܶܫܒ̈ܚܳܬܶܗ ܐܶܢܶܝܢ܆ ܡܶܛܽܠ ܕܚܽܘܒܶܗ ܬܰܪܣܺܝ ܠـܠܶܒܝ܆ ܘܰܥܕܰܡܳܐ ܠܣܶܦܘܴ̈ܬܝ ܓ݀ܳܣܶܐ ܗ̱ܘܳܐ ܦܺܐܪ̈ܰܘܗܝ.

Oda 16, estrofa 3

ܚܽܘܒܝ ܓܶܝܪ ܡܳܪܝܰܐ ܗ̱ܘܼ܆ ܡܶܛܽܠܗܳܢܳܐ ܐܶܙܡܰܪ ܠܶܗ.

Oda 16, estrofa 4

ܡܚܰܝܰܠ ܐ̱ܢܳܐ ܓܶܝܪ ܒܬܶܫܒ̈ܚܳܬܶܗ܆ ܘܗܰܝܡܳܢܽܘܬܳܐ ܐܺܝܬ ܠܺܝ ܒܶܗ.

Oda 16, estrofa 5

ܐܶܦܬܰܚ ܦܽܘܡܝ܆ ܘܰܬܡܰܠܶܠܝ ܒܺܝ ܪܽܘܚܶܗ܆ ܬܶܫܒܽܘܚܬܶܗ ܕܡܳܪܝܳܐ ܘܝܳܐܝܽܘܬܶܗ.

Oda 16, estrofa 6

ܥܒܴܿܕܳܐ ܕܺܐܝ̈ܕܰܘܗ̱ܝ܆ ܘܦܽܘܠܚܳܢܳܐ ܕܨܶܒ̈ܥܳܬܶܗ.

Oda 16, estrofa 7

ܠܣܽܘܓܳܐܐ ܕܪܱ̈ܚܡܰܘܗ̱ܝ܆ ܘܰܠܥܽܘܫܢܳܐ ܕܡܶܠܬܶܗ.

Oda 16, estrofa 8

ܡܶܠܬܶܗ ܓܶܝܪ ܕܡܳܪܝܳܐ ܒܳܨܿܝܳܐ ܡܶܕܶܡ ܕܠܴܐ ܡܶܬܚܙܶܐ܆ ܘܕܳܓܠܴܐ ܡܰܚܫܰܒܬܶܗ.

Oda 16, estrofa 9

ܚܿܳܙܝܳܐ ܓܶܝܪ ܥܰܝܢܳܐ ܥܒܴ̈ܕܰܘܗ̱ܝ܆ ܘܐܷܕܢܳܐ ܫܳܡܿܥܳܐ ܠܡܰܚܫܰܒܬܶܗ.

Oda 16, estrofa 10

ܗܽܘܼ ܐܰܦܬܺܝ ܠܰܐܪܥܳܐ܆ ܘܐܱܘܬܶܒ ܡܰܝܴ̈ܐ ܒܝܰܡܳܐ.

Oda 16, estrofa 11

ܡܬܰܚ ܫܡܰܝܳܐ܆ ܘܐܱܬܩܶܢ ܟܰܘ̈ܟܒܶܐ.

Oda 16, estrofa 12

ܘܐܱܬܩܶܢ ܠܰܒܪܺܝܬܳܐ ܘܰܐܩܺܝܡܳܗܿ܆ ܘܐܷܬܬܢܺܝܚ ܗ̱ܽܘܼ ܡܼܶܢ ܥܒܴ̈ܕܰܘܗ̱ܝ.

Oda 16, estrofa 13

ܘܒܶܪ̈ܝܳܬܳܐ ܒܪ̈ܰܗܛܰܝܗܶܝܢ ܪ̈ܳܗܛܳܢ܆ ܘܰܥܒܴ̈ܕܰܝܗܶܝܢ ܥܳܒ̈ܕܳܢ܆ ܘܠܴܐ ܝܳܕ̈ܥܳܢ ܠܰܡܩܳܡ ܘܰܠܡܶܒܛܰܠ.

Oda 16, estrofa 14

ܘܚܰܝ̈ܠܰܘܳܬܳܐ ܡܶܫܬܰܥܒܕܺܝܢ ܠܡܶܠܬܶܗ.

Oda 16, estrofa 15

ܣܺܝܡܬܳܐ ܕܢܽܘܗܪܳܐ ܫܶܡܫܰܐ ܗ̱ܘܼ܆ ܘܣܺܝܡܬܳܐ ܕܚܶܫܽܘܟܳܐ ܠܶܠܝܰܐ ܗ̱ܘܼ.

Oda 16, estrofa 16

ܥܒܼܰܕ ܕܶܝܢ ܫܶܡܫܳܐ ܠܝܰܘܡܳܐ ܕܢܶܗܘܶܐ ܢܰܗܺܝܪ܆ ܡܰܝܬܶܐ ܕܶܝܢ ܠܚܶܫܽܘܟܳܐ ܠܶܠܝܳܐ ܥܰܠ ܐܰܦܶܝ̈ܗܿ ܕܰܐܪܥܳܐ.

Oda 16, estrofa 17

ܘܩܽܘܒܳܠܗܽܘܢ ܕܚܰܕ ܡܼܶܢ ܚܰܕ܆ ܝܳܐܝܽܘܬܶܗ ܕܰܐܠܳܗܳܐ ܡܡܰܠܶܝܢ.

Oda 16, estrofa 18

ܘܠܰܝܬ ܡܶܕܶܡ ܕܰܠܒܰܪ ܡܼܶܢ ܡܳܪܝܳܐ܆ ܡܶܛܽܠ ܕܗܽܘܼ ܐܺܝܬܰܘܗ̱ܝ ܗ̱ܘܳܐ ܡܼܶܢ ܩܕܳܡ ܟܽܠ ܢܶܗܘܶܐ.

Oda 16, estrofa 19

ܘܥܳܠ̈ܡܶܐ ܒܡܶܠܬܶܗ ܗܘܰܘ܆ ܘܰܒܡܰܚܫܰܒܬܳܐ ܕܠܶܒܶܗ.

Oda 16, estrofa 20

ܬܶܫܒܽܘܚܬܳܐ ܘܐܺܝܩܳܪܳܐ ܠܰܫܡܶܗ. ܗܰܠܶܠܘܽܝܰܐ.

Oda 17, estrofa 1

ܐܶܬܟܿܰܠܠܶܬ ܕܶܝܢ ܒܰܐܠܳܗܝ܆ ܘܟܠܺܝܠܝ ܚܰܝܰܐ ܗ̱ܘܼ.

Oda 17, estrofa 2

ܘܐܶܙܕܰܕܩܿܶܬ ܒܡܳܪܝ܆ ܦܺܘܪܩܳܢܝ ܕܶܝܢ ܕܠܴܐ ܚܒܴܿܠܱܐ ܗ̱ܘܼ.

Oda 17, estrofa 3

ܐܶܫܿܬܪܺܝܬ ܠܺܝ ܡܶܢ ܣܪ̈ܺܝܩܳܬܳܐ܆ ܘܠܴܐ ܐܺܝܬܰܝ ܡܚܰܝܒܳܐ.

Oda 17, estrofa 4

ܚܢܴ̈ܩܰܝ ܐܶܬܦܣܶܩܘ ܒܐܺܝ̈ܕܶܝܗܿ܆ ܐܰܦܷ̈ܐ ܘܰܕܡܽܘܬܳܐ ܕܦܳܪܨܽܘܦܳܐ ܚܰܕܬܳܐ ܢܶܣܒܿܶܬ܆ ܘܗܰܠܟܶܬ ܒܶܗ ܘܐܶܬܦܱܿܪܩܶܬ.

Oda 17, estrofa 5

ܘܡܰܚܫܰܒܬܳܐ ܕܰܫܪܳܪܳܐ ܕܒܰܪܬܰܢܝ܆ ܘܐܷܙܶܠܬ ܒܳܬܪܳܗܿ ܘܠܴܐ ܛܥܺܝܬ.

Oda 17, estrofa 6

ܘܟܽܠ ܕܰܚܙܰܐܘܽܘܢܝ ܬܡܰܗܘ܆ ܘܐܰܝܟ ܐܰܟܣܢܳܝܳܐ ܐܶܣܿܬܰܒܪܶܬ ܠܗܽܘܢܿ.

Oda 17, estrofa 7

ܘܗܘܿ ܕܝܳܕܰܥ (ܗ̱ܘܳܐ ܘܪܒܰܢܝ)܆ ܡܪܰܝܡܳܐ ܒܟܽܠܶܗ ܫܽܘܡܠܳܝܶܗ.

Oda 17, estrofa 8

ܘܫܰܒܚܰܢܝ ܒܒܰܣܺܝܡܽܘܬܶܗ܆ ܘܐܱܪܺܝܡ ܠܰܡܪܰܘܡܳܐ ܕܰܫܪܳܪܳܐ ܡܰܕܰܥܝ.

Oda 17, estrofa 9

ܘܡܼܶܢ ܬܰܡܳܢ ܝܰܗ̱ܒ ܠܺܝ ܐܽܘܪܚܳܐ ܕܗܰܠܟ̈ܳܬܶܗ܆ ܘܦܶܬܚܿܶܬ ܬܰܪ̈ܥܶܐ ܕܰܐܚܺܝܕܺܝܢ ܗ̱ܘܰܘ.

Oda 17, estrofa 10

ܘܓܰܕܡܷܿܬ ܡܽܘܟ̈ܠܷܐ ܕܦܰܪܙܠܴܐ܆ ܦܰܪܙܠܴܐ ܕܶܝܢ ܕܺܝܠܝ ܪܬܼܰܚ ܘܐܶܬܦܰܫܰܪ ܩܕܳܡܰܝ.

Oda 17, estrofa 11

ܘܠܴܐ ܡܶܕܶܡ ܐܶܬܚܙܺܝ ܠܺܝ ܟܰܕ ܐܰܚܺܝܕ܆ ܡܶܛܽܠ ܕܰܦܬܳܚܳܐ ܕܟܽܠܡܶܕܶܡ ܐܶܢܳܐ ܐܺܝܬܰܝ ܗ̱ܘܺܝܬ.

Oda 17, estrofa 12

ܘܐܷܙܰܠ ܗ̱ܘܺܝܬ ܥܰܠ ܟܽܠܗܽܘܢܿ ܐܰܚܺܝ̈ܕܰܝ ܠܡܶܫܪܳܐ ܐܶܢܽܘܢܿ܆ ܕܠܴܐ ܐܶܫܒܽܘܩ ܠܐܢܳܫ ܟܰܕ ܐܰܣܺܝܪ (ܐܰܣܺܝܪ ܕܐܳܣܱܿܪ).

Oda 17, estrofa 13

ܘܝܶܗܿܒܶܬ ܝܺܕܰܥܬܝ ܕܠܴܐ ܚܣܳܡ܆ ܘܒܳܥܽܘܬܝ ܒܚܽܘܒܳܐ ܕܺܝܠܝ.

Oda 17, estrofa 14

ܘܙܶܪܥܷܿܬ ܒܠܶܒܰܘܴ̈ܬܳܐ ܦܺܐܪܱ̈ܝ܆ ܘܫܰܚܿܠܦܶܬ ܐܶܢܽܘܢܿ ܒܺܝ.

Oda 17, estrofa 15

ܘܩܰܒܶܠܘ ܒܽܘܪܟܬܳܐ ܕܺܝܠܝ ܘܰܚܝܰܘ܆ ܘܶܐܬܟܰܢܰܫܘ ܠܘܳܬܝ ܘܐܶܬܦܪܶܩܘ.

Oda 17, estrofa 16

ܡܶܛܽܠ ܕܰܗܘܰܘ ܠܺܝ ܗܰܕܳܡܷ̈ܐ܆ ܘܐܶܢܳܐ ܪܺܝܫܗܽܘܢܿ.

Oda 17, estrofa 17

ܬܶܫܒܺܘܚܬܳܐ ܠܳܟ ܪܺܝܫܰܢ ܡܳܪܝܳܐ ܡܫܺܝܚܳܐ. ܗܰܠܶܠܘܽܝܰܐ.

Oda 18, estrofa 1

ܐܶܬܬܪܺܝܡ ܠܶܒܝ ܒܚܽܘܒܶܗ ܕܰܡܪܰܝܡܳܐ ܘܐܷܬܝܰܬܰܪ܆ ܕܐܷܫܰܒܚܺܝܘܗ̱ܝ ܒܝܰܕ ܫܶܡܝ.

Oda 18, estrofa 2

ܐܶܬܥܰܫܰܢܘ ܗܰܕܳܡܱ̈ܝ܆ ܐܰܝܟ ܕܠܴܐ ܢܶܦܠܽܘܢ ܡܼܶܢ ܚܰܝܠܶܗ.

Oda 18, estrofa 3

ܟܽܘܪ̈ܗܳܢܶܐ ܐܶܬܪܰܚܰܩܘ ܡܼܶܢ ܦܰܓܪܝ܆ ܘܩܳܡ ܠܡܳܪܝܳܐ ܒܨܶܒܝܳܢܶܗ܆ ܡܶܛܽܠ ܕܫܰܪܺܝܪܳܐ ܗ̱ܝܼ ܡܰܠܟܽܘܬܶܗ.

Oda 18, estrofa 4

ܡܳܪܝܳܐ ܕܰܠܡܳܐ ܡܶܛܽܠ ܐܰܝܠܶܝܢ ܕܚܰܣܺܝܪܺܝܢ܆ ܬܶܫܕܶܐ ܡܶܢܝ ܦܶܬܓܳܡܳܟ.

Oda 18, estrofa 5

ܐܳܦܠܴܐ ܡܶܛܽܠ ܥܒܿܳܕܰܝ̈ܗܽܘܢܿ܆ ܬܶܟܠܷܐ ܡܶܢܝ ܫܽܘܡܠܳܝܳܟ.

Oda 18, estrofa 6

ܠܴܐ ܢܶܙܕܟܶܐ ܢܰܗܺܝܪܳܐ ܡܼܶܢ ܚܶܫܽܘܟܳܐ܆ ܐܳܦ ܠܴܐ ܢܶܥܪܽܘܩ ܫܪܳܪܳܐ ܡܼܶܢ ܕܰܓܳܠܽܘܬܳܐ.

Oda 18, estrofa 7

ܠܙܳܟܽܘܬܳܐ ܬܣܺܝܡܝ ܦܽܘܪܩܳܢܰܢ ܝܰܡܝܺܢܳܟ܆ ܘܰܬܩܰܒܶܠ ܡܶܢ ܟܽܠ ܐܰܬܰܪ܆ ܘܰܬܢܰܛܰܪ ܡܼܶܢ ܠܟܽܠ ܕܰܒܒܺܝ̈ܫܳܬܳܐ ܐܰܚܺܝܕ.

Oda 18, estrofa 8

ܐܰܢ̱ܬ ܐܰܠܳܗܝ ܕܰܓܳܠܽܘܬܳܐ ܘܡܰܘܬܳܐ ܠܰܝܬ ܒܦܽܘܡܳܟ܆ ܐܶܠܴܐ ܐܺܝܬܰܘܗ̱ܝ ܫܽܘܡܠܳܝܳܐ ܨܶܒܝܳܢܳܟ.

Oda 18, estrofa 9

ܘܰܣܪܺܝܩܽܘܬܳܐ ܠܴܐ ܝܿܳܕܰܥ ܐܰܢ̱ܬ܆ ܡܶܛܽܠ ܕܳܐܦܠܴܐ ܝܳܕܥܳܐ ܠܳܟ.

Oda 18, estrofa 10

ܘܠܴܐ ܝܿܳܕܰܥ ܐܰܢ̱ܬ ܛܳܥܝܽܘܬܳܐ܆ ܡܶܛܽܠ ܕܐܳܦܠܴܐ ܗ̱ܝܼ ܝܳܕܥܳܐ ܠܳܟ.

Oda 18, estrofa 11

ܘܐܷܬܚܰܙܝܰܬ ܐܰܝܟ ܥܽܘܪܳܐ ܠܴܐ ܝܺܕܰܥܬܳܐ܆ ܘܐܰܝܟ ܣܰܪܝܽܘܬܶܗ ܕܝܰܡܳܐ.

Oda 18, estrofa 12

ܘܰܣܒܼܰܪܘ ܥܠܶܝܗܿ ܣܪ̈ܺܝܩܶܐ ܕܪܰܒܳܐ ܗ̱ܝܼ܆ ܘܐܶܬܰܘ ܐܶܦ ܗܳܢܽܘܢܿ ܐܰܝܟ ܕܡܽܘܬܳܗܿ ܘܐܶܣܬܰܪܰܩܘ.

Oda 18, estrofa 13

ܘܝܼܺܕܰܥܘ ܐܰܝܠܶܝܢ ܕܝܿܳܕܥܺܝܢ ܘܐܶܬܚܰܫܰܒܘ܆ ܘܠܴܐ ܐܶܬܛܰܢܰܦܘ ܒܡܰܚܫ̈ܒܳܬܗܽܘܢܿ.

Oda 18, estrofa 14

ܡܶܛܽܠ ܕܰܗܘܰܘ ܒܬܰܪܥܺܝܬܶܗ ܕܰܡܪܰܝܡܳܐ܆ ܘܰܓܚܶܟܘ ܥܰܠ ܐܰܝܠܶܝܢ ܕܰܡܗܰܠܟܺܝܢ ܒܛܳܥܝܽܘܬܳܐ.

Oda 18, estrofa 15

ܘܗܳܢܽܘܢܿ ܕܶܝܢ ܡܰܠܶܠܘ ܫܪܳܪܳܐ܆ ܡܼܶܢ ܢܦܳܚܳܐ ܕܰܢܼܦܰܚ ܒܗܽܘܢܿ ܡܪܰܝܡܳܐ.

Oda 18, estrofa 16

ܬܶܫܒܘܽܚܬܳܐ ܘܪܰܒܘܽܬ ܝܳܐܝܘܽܬܳܐ ܠܰܫܡܶܗ. ܗܰܠܶܠܘܽܝܰܐ.

Oda 19, estrofa 1

ܟܳܣܳܐ ܕܚܰܠܒܳܐ ܐܶܬܩܰܪܰܒ ܠܻܝ܆ ܘܐܷܫܿܬܺܝܬܶܗ ܒܚܰܠܝܽܘܬܳܐ ܕܒܰܣܺܝܡܽܘܬܶܗ ܕܡܳܪܝܳܐ.

Oda 19, estrofa 2

ܒܪܳܐ ܟܳܣܳܐ ܐܺܝܬܰܘܗ̱ܝ܆ ܘܗܰܘܿ ܕܐܶܬܚܠܶܒ ܐܰܒܳܐ܆ ܘܕܰܚܠܼܰܒܬܶܗ ܪܽܘܚܳܐ ܕܩܽܘܕܫܳܐ.

Oda 19, estrofa 3

ܡܶܛܽܠ ܕܰܬܕܰܘ̈ܗ̱ܝ ܐܶܬܡܠܺܝܘ܆ ܘܠܴܐ ܡܶܬܒܥܶܐ ܗ̱ܘܳܐ ܕܰܣܦܺܝܩܳܐܻܝܬ ܢܶܫܬܕܶܐ ܚܰܠܒܶܗ.

Oda 19, estrofa 4

ܦܶܬܼܚ݀ܰܬ ܥܽܘܒܳܗܿ ܪܽܘܚܳܐ ܕܩܽܘܕܫܳܐ܆ ܘܡܶܙܓܰܬ ܚܰܠܒܳܐ ܕܰܬܪܶܝܢ ܬܕܰܘ̈ܗ̱ܝ ܕܰܐܒܳܐ.

Oda 19, estrofa 5

ܘܝܶܗܼܒܰܬ ܚܽܘܠܛܳܢܳܐ ܠܥܳܠܡܳܐ ܟܰܕ ܠܴܐ ܝܳܕܥܺܝܢ܆ ܘܗܿܳܢܽܘܢܿ ܕܢܳܣܒܺܝܢ ܒܫܽܘܡܠܳܝܳܗܿ ܐܶܢܽܘܢܿ ܕܝܰܡܺܝܢܳܐ.

Oda 19, estrofa 6

(ܓܳܦܰܬܼ ܟܰܪܣܳܗܿ ܕܰܒܬܽܘܠܬܳܐ܆ ܘܢܶܣܼܒܰܬ ܒܰܛܢܳܐ ܘܝܶܠܕܰܬ.

Oda 19, estrofa 7

ܘܰܗܘܳܬ ܐܶܡܳܐ ܒܬܽܘܠܬܳܐ ܒܪ̈ܰܚܡܶܐ ܣܰܓܺܝܷ̈ܐܐ).

Oda 19, estrofa 8

ܘܚܰܒܠ݀ܰܬ ܘܝܶܠܕܰܬ ܒܪܳܐ ܘܠܴܐ ܟܴܿܐܶܒ ܠܳܗܿ܆ ܡܶܛܽܠ ܕܠܴܐ ܗ̱ܘܳܐ ܣܦܺܝܩܳܐܻܝܬ ܗܘܳܬ.

Oda 19, estrofa 9

ܘܠܴܳܐ ܒܥܼܳܬ ܚܰܝܬܳܐ܆ ܡܶܛܽܠ ܕܐܱܚܝܳܗܿ.

Oda 19, estrofa 10

ܐܰܝܟ ܓܰܒܪܳܐ ܝܶܠܼܕܰܬ ܒܨܶܒܝܳܢܳܐ܆ ܘܝܶܠܕܰܬ ܒܬܰܚܘܺܝܬܳܐ܆ ܘܰܩܢ݀ܳܬ ܒܽܐܘܚܕܳܢܳܐ ܣܰܓܺܝܐܴܐ.

Oda 19, estrofa 11

ܘܐܰܚܒܼܰ݀ܬ ܒܦܘܽܪܩܳܢܳܐ܆ ܘܢܼܰܛܪܰܬ ܒܒܰܣܺܝܡܘܽܬܳܐ܆ ܘܚܰܘܝ݀ܰܬ ܒܪܰܒܘܽܬܳܐ. ܗܰܠܶܠܘܽܝܰܐ.

Oda 20, estrofa 1

ܟܳܗܢܳܐ ܕܡܳܪܝܳܐ ܐܺܝܬܰܝ܆ ܘܠܶܗ ܗ̱ܽܘܼ ܡܟܰܗܶܢ ܐ̱ܢܳܐ.

Oda 20, estrofa 2

ܘܠܶܗ ܡܩܰܪܶܒ ܐ̱ܢܳܐ ܩܽܘܪܒܳܢܳܐ ܕܡܰܚܫܰܒܬܶܗ.

Oda 20, estrofa 3

ܠܴܐ ܗ̱ܘܳܬ ܓܶܝܪ ܐܰܝܟ ܥܳܠܡܳܐ܆ ܐܳܦܠܴܐ ܐܰܝܟ ܒܶܣܪܳܐ ܡܰܚܫܰܒܬܶܗ܆ ܐܳܦܠܴܐ ܐܰܝܟ ܗܳܢܽܘܢܿ ܕܦܳܠܚܺܝܢ ܒܶܣܪܳܢܳܐܻܝܬ.

Oda 20, estrofa 4

ܩܽܘܪܒܳܢܶܗ ܕܡܳܪܝܳܐ ܙܰܕܺܝܩܘܽܬܳܐ ܗ̱ܝܼ܆ ܘܕܰܟܝܽܘܬܳܐ ܕܠܶܒܳܐ ܘܰܕܣܶܦܘܴ̈ܬܳܐ.

Oda 20, estrofa 5

ܩܰܪܶܒ ܟܽܘ̈ܠܝܳܬܳܟ ܕܠܴܐ ܡܽܘܡܳܐ܆ ܘܪ̈ܰܚܡܰܝܟ ܠܴܐ ܢܶܐܠܨܘܽܢ ܪ̈ܰܚܡܶܐ܆ ܘܢܰܦܫܳܟ ܠܴܐ ܬܶܐܠܽܘܨܝ ܢܰܦܫܳܐ.

Oda 20, estrofa 6

ܠܴܐ ܬܶܩܢܶܐ ܢܽܘܟܪܳܝܳܐ ܒܰܕܡܳܐ ܕܢܰܦܫܳܟ܆ (LINE MISSING) ܘܐܳܦܠܴܐ ܬܰܚܣܪܺܝܘܗ̱ܝ ܠܬܰܟܣܺܝܬܳܐ ܕܦܽܘܪܣܳܝܶܗ.

Oda 20, estrofa 7

ܠܒܰܫ ܕܶܝܢ ܛܰܝܒܽܘܬܶܗ ܕܡܳܪܝܳܐ ܕܠܴܐ ܚܣܳܡܳܐ܆ ܘܬܳܐ ܠܦܰܪܕܰܝܣܶܗ܆ ܘܰܥܒܶܕ ܠܳܟ ܟܠܺܝܠܴܐ ܡܼܶܢ ܐܺܝܠܳܢܶܗ.

Oda 20, estrofa 8

ܘܣܺܝܡ ܥܰܠ ܪܺܝܫܳܟ ܘܐܶܬܒܰܣܰܡ܆ ܘܐܶܣܬܡܶܟ ܥܰܠ ܢܺܝܚܽܘܬܶܗ.

Oda 20, estrofa 9

ܘܰܬܗܰܠܶܟ ܩܕܳܡܰܝܟ ܬܶܫܒܽܘܚܬܶܗ܆ ܘܰܬܩܰܒܶܠ ܡܼܶܢ ܒܰܣܺܝܡܽܘܬܶܗ ܘܡܼܶܢ ܛܰܝܒܽܘܬܶܗ܆ ܘܬܶܕܗܰܢ ܒܰܫܪܳܪܳܐ ܒܬܶܫܒܽܘܚܬܳܐ ܕܚܰܣܝܽܘܬܶܗ.

Oda 20, estrofa 10

ܬܶܫܒܽܘܚܬܳܐ ܘܐܺܝܩܳܪܳܐ ܠܰܫܡܶܗ. ܗܰܠܶܠܘܽܝܰܐ.

Oda 21, estrofa 1

ܕܪ̈ܳܥܰܝ ܐܰܪܺܝܡܷܿܬ ܠܰܡܪܰܘܡܳܐ܆ ܠܰܚܢܳܢܶܗ ܕܡܳܪܝܳܐ.

Oda 21, estrofa 2

ܡܶܛܽܠ ܕܰܐܣܽܘܪ̈ܰܝ ܫܼܕܳܐ ܡܶܢܝ܆ ܘܐܱܪܺܝܡܰܢܝ ܡܥܰܕܪܳܢܝ ܠܰܚܢܳܢܶܗ ܘܰܠܦܽܘܪܩܳܢܶܗ.

Oda 21, estrofa 3

ܘܫܷܿܠܚܶܬ ܚܶܫܽܘܟܳܐ܆ ܘܠܶܒܿܫܶܬ ܢܽܘܗܪܳܐ.

Oda 21, estrofa 4

ܘܰܗܘܰܘ ܠܺܝ ܗܱ̈ܕܳܡܶܐ ܠܘܳܬ ܢܰܦܫܝ܆ ܟܰܕ ܘܠܴܐ ܐܺܝܬ ܒܗܽܘܢܿ ܟܺܐܒܳܐ܆ ܐܳܦܠܴܐ ܐܽܘܠܨܳܢܳܐ ܐܳܦܠܴܐ ܚܰܫܷ̈ܐ.

Oda 21, estrofa 5

ܘܝܰܬܺܝܪܳܐܻܝܬ ܡܥܰܕܪܳܢܺܝܬܳܐ ܗܘܼܳܬ ܠܺܝ ܡܰܚܫܰܒܬܶܗ ܕܡܳܪܝܳܐ܆ ܘܫܰܘܬܳܦܽܘܬܶܗ ܕܠܴܐ ܚܒܳܠܴܐ.

Oda 21, estrofa 6

ܘܐܶܬܬܪܺܝܡܿܶܬ ܒܢܽܘܗܪܳܐ܆ ܘܥܶܒܿܪܶܬ ܩܕܳܡ ܐܰܦܰܘ̈ܗ̱ܝ.

Oda 21, estrofa 7

ܘܰܗܘܺܝܬ ܩܰܪܺܝܒ ܐ̱ܢܳܐ ܘܡܰܘܕܶܐ ܐ̱ܢܳܐ ܠܶܗ. ...

Oda 21, estrofa 8

ܐܰܒܼܰܥ ܠܶܒܝ ܘܐܶܫܬܟܰܚ ܒܦܽܘܡܝ܆ ܘܰܕܢܰܚ ܥܰܠ ܣܶܦܘܴ̈ܬܝ.

Oda 21, estrofa 9

ܘܝܺܪܶܒ ܥܰܠ ܐܰܦܱ̈ܝ ܕܝܳܨܶܗ ܕܡܳܪܝܳܐ ܘܬܶܫܒܘܽܚܬܶܗ. ܗܰܠܶܠܘܽܝܰܐ.

Oda 22, estrofa 1

ܗܰܘ ܕܡܰܚܶܬ ܡܼܶܢ ܡܪܰܘܡܳܐ܆ ܘܡܰܣܶܩ ܠܺܝ (ܡܼܶܢ ܬܰܚܬܳܝܴ̈ܬܳܐ).

Oda 22, estrofa 2

ܘܗܰܘܿ ܕܰܡܟܰܢܶܫ ܡܶܨܥܳܝܴ̈ܬܳܐ܆ ܘܪܳܡܷܿܐ ܠܶܗܝܢ ܠܻܝ.

Oda 22, estrofa 3

ܗܰܘܿ ܕܒܰܕܰܪ ܠܰܒܥܶܠܕܒܴ̈ܒܰܝ܆ ܘܠܰܒܥܶܠܕ ܝܻ̈ܢܰܝ.

Oda 22, estrofa 4

ܗܰܘܿ ܕܝܰܗ̱ܒܼ ܠܺܝ ܫܽܘܠܛܳܢܳܐ ܕܐܱܣܽܘܪ̈ܶܐ܆ ܐܰܝܟ ܕܐܷܫܪܶܐ ܐܶܢܽܘܢܿ.

Oda 22, estrofa 5

ܗܰܘܿ ܕܣܰܚܼܶܦ ܒܐܺܝ̈ܕܰܝ ܠܬܰܢܺܝܢܳܐ ܕܫܰܒܥܶܐ ܪ̈ܺܝܫܰܘܗ̱ܝ܆ ܘܐܰܩܺܝܡܬܳܢܝ ܥܰܠ ܥܶܩܳܪ̈ܰܘܗ̱ܝ ܕܰܐܘܒܶܕ ܙܰܪܥܶܗ.

Oda 22, estrofa 6

ܐܰܢ̱ܬ ܗܘܼܰܝܬ ܬܰܡܳܢ ܘܥܰܕܰܪܬܳܢܝ܆ ܘܒܟܽܠ ܐܰܬܰܪ ܫܡܳܟ ܟܪܺܝܟ ܗ̱ܘܳܐ ܠܺܝ.

Oda 22, estrofa 7

ܚܰܒܠܰܬ ܝܰܡܺܝܢܳܟ (ܠܡܶܪܬܳܗܿ ܕܒܺܝܫܬܳܐ)܆ ܘܐܱܫܘܝܰܬ ܐܺܝܕܳܟ ܐܽܘܪܚܳܐ ܠܐܰܝܠܶܝܢ ܕܰܡܗܰܝܡܢܺܝܢ ܒܳܟ.

Oda 22, estrofa 8

(ܘܰܓܒܼܰܝ݀ܬ ܐܶܢܽܘܢܿ) ܡܼܶܢ ܩܰܒܪܷ̈ܐ܆ (ܘܰܦܼܪܰܫܬ ܐܶܢܽܘܢܿ) ܡܼܶܢ ܡܺܝ̈ܬܶܐ.

Oda 22, estrofa 9

ܢܣܼܰܒܬ ܓܰܪ̈ܡܶܐ ܡܺܝ̈ܬܶܐ܆ ܘܩܼܶܪܡ݀ܰܬ ܥܠܰܝܗܽܘܢܿ ܦܰܓܪ̈ܶܐ.

Oda 22, estrofa 10

ܘܠܴܐ ܡܶܬܬܙܺܝܥܺܝܢ ܗ̱ܘܰܘ܆ ܘܝܰܗܼܒܬ ܡܰܥܒܕܳܢܽܘܬܳܐ ܠܚܰܝܷ̈ܐ.

Oda 22, estrofa 11

ܕܠܴܐ ܚܒܳܠܴܐ ܗܘܳܬ ܐܽܘܪܚܳܟ ܘܦܰܪܨܽܘܦܳܟ܆ ܐܰܝܬܺܝܬ ܠܥܳܠܡܳܟ ܠܰܚܒܳܠܴܐ܆ ܕܢܶܫܬܪܶܐ ܟܽܠܡܶܕܶܡ ܘܢܶܬܚܰܕܰܬ.

Oda 22, estrofa 12

ܘܬܶܗܘܶܐ ܫܶܬܶܐܣܬܳܐ ܠܟܽܠܡܶܕܶܡ ܟܺܐܦܳܟ܆ ܘܰܥܠܶܝܗܿ ܒܢܰܝܬ ܡܰܠܟܽܘܬܳܟ܆ ܘܰܗܘܼܳܬ ܒܶܝܬ ܡܰܥܡܪܳܐ ܕܩܰܕܺܝܫܷ̈ܐ. ܗܰܠܶܠܘܽܝܰܐ.

Oda 23, estrofa 1

ܚܰܕܽܘܬܳܐ ܕܩܰܕܺܝ̈ܫܶܐ ܗ̱ܝܼ܆ ܘܡܰܢܽܘ ܢܶܠܒܫܺܝܗܿ ܐܶܠܴܐ ܐܶܢ ܗܼܶܢܽܘܢ ܒܰܠܚܽܘܕ.

Oda 23, estrofa 2

ܛܰܝܒܽܘܬܳܐ ܕܓܰܒܰܝܴ̈ܐ ܗ̱ܝܼ܆ ܘܡܰܢܽܘ ܢܶܣܒܺܝܗܿ ܐܠܴܐ ܐܶܢ ܗܿܳܢܽܘܢܿ ܕܰܬܟܺܝܠܺܝܢ ܥܠܶܝܗܿ ܡܼܶܢ ܒܪܺܝܫܺܝܬ.

Oda 23, estrofa 3

ܚܽܘܒܳܐ ܕܰܓܒܰܝܱ̈ܐ ܗ̱ܘ܆ ܘܡܰܢܽܘ ܢܶܠܒܫܺܝܘܗ̱ܝ ܐܶܠܴܐ ܐܶܢ ܗܿܳܢܽܘܢܿ ܕܰܩܢܰܐܘܽܗ̱ܝ ܡܼܶܢ ܒܪܺܝܫܺܝܬ.

Oda 23, estrofa 4

ܗܰܠܶܟܘ ܒܺܝܕܰܥܬܶܗ ܕܡܳܪܝܳܐ܆ ܘܬܶܕܥܽܘܢ ܛܰܝܒܽܘܬܶܗ ܕܡܳܪܝܳܐ ܕܠܴܐ ܚܣܳܡܳܐ܆ ܘܠܰܕܝܳܨܶܗ ܘܰܠܫܽܘܡܠܳܝܳܐ ܕܝܺܕܰܥܬܶܗ.

Oda 23, estrofa 5

ܘܡܰܚܫܰܒܬܶܗ ܗܘܼܳܬ ܐܰܝܟ ܐܶܓܰܪܬܳܐ܆ ܘܨܶܒܝܳܢܳܗܿ ܢܚܶܬ ܡܼܶܢ ܡܪܰܘܡܳܐ.

Oda 23, estrofa 6

ܘܐܶܫܬܰܕܰܪ ܐܰܝܟ ܓܶܐܪܳܐ ܡܼܶܢ ܩܶܫܬܳܐ܆ ܕܡܶܫܬܕܶܐ ܒܰܩܛܺܝܪܳܐ.

Oda 23, estrofa 7

ܘܰܪ̈ܗܶܛܝ ܥܰܠ ܐܶܓܰܪܬܳܐ ܐܺܝ̈ܕܰܝܳܐ ܣܰܓܺܝ̈ܳܐܬܳܐ܆ ܠܡܶܚܛܰܦ ܘܰܠܡܶܣܰܒ ܘܰܠܡܶܩܪܶܝܗܿ.

Oda 23, estrofa 8

ܘܥܶܪܩ݀ܰܬ ܡܼܶܢ ܨܶܒ̈ܥܳܬܗܘܽܢ܆ ܘܰܕܚܶܠܘ ܡܶܢܳܗܿ ܘܡܼܶܢ ܚܰܬܡܳܐ ܕܰܥܠܶܝܗܿ.

Oda 23, estrofa 9

ܡܶܛܽܠ ܕܠܴܐ ܫܰܠܺܝܛ ܗ̱ܘܳܐ ܠܗܽܘܢܿ ܠܡܶܫܪܳܐ ܚܰܬܡܳܗܿ܆ ܚܰܝܠܴܐ ܓܶܝܪ ܕܐܺܝܬ ܗ̱ܘܳܐ ܥܰܠ ܚܰܬܡܳܐ ܡܝܰܬܰܪ ܗ̱ܘܳܐ ܡܶܢܗܽܘܢܿ.

Oda 23, estrofa 10

ܐܶܙܰܠܘ ܕܶܝܢ ܒܳܬܪܳܗܿ ܕܶܐܓܰܪܬܳܐ ܗܿܳܢܽܘܢܿ ܕܰܚܙܰܐܘܽܗܿ܆ ܕܢܶܕܥܽܘܢ ܐܰܝܟܳܐ ܫܿܳܪܝܳܐ܆ ܘܰܕܡܰܢܽܘ ܩܿܳܪܶܐ ܠܳܗܿ܆ ܘܡܰܢܽܘ ܫܿܳܡܰܥ ܠܳܗܿ.

Oda 23, estrofa 11

ܓܺܝܓܠܴܐ ܕܶܝܢ ܩܰܒܶܠܬܳܗܿ܆ ܘܐܳܬܝܳܐ ܗ̱ܘܳܬ ܥܠܶܝܗܿ.

Oda 23, estrofa 12

ܘܐܳܬܿܳܐ ܐܺܝܬ ܗ̱ܘܳܐ ܥܰܡܳܗܿ܆ ܕܡܰܠܟܽܘܬܳܐ ܘܕܰܡܕܰܒܪܳܢܘܽܬܳܐ.

Oda 23, estrofa 13

ܘܟܽܠܡܶܕܶܡ ܕܰܡܙܺܝܥ ܗ̱ܘܳܐ ܠܓܺܝܓܠܴܐ܆ ܚܴܿܨܕܳܐ ܗ̱ܘܳܬܿ ܠܶܗ ܘܰܡܦܱܿܣܩܶܐ ܗ̱ܘܳܬ ܠܶܗ.

Oda 23, estrofa 14

ܘܣܽܘܓܳܐܐ ܚܶܡܼܠ݀ܰܬ ܕܣܰܩܽܘܒ̈ܠܶܐ ܗ̱ܘܰܘ܆ ܘܛܰܡܼܪܰܬܿ ܥܼܶܩܪܰܬܿ ܥܳܒܷ̈ܐ ܣܰܓܺܝܷ̈ܐܐ܆

Oda 23, estrofa 15

ܘܥܶܒܼܕܰܬܿ ܐܽܘܪܚܳܐ ܦܬܺܝܬܳܐ. ...

Oda 23, estrofa 16

ܢܚܼܶܬ ܪܺܝܫܳܐ ܠܘܳܬ ܪ̈ܶܓܠܶܐ܆ ܡܶܛܽܠ ܕܰܥܕܰܡܳܐ ܠܪ̈ܶܓܠܶܐ ܪܶܗܼܛ݀ܰܬ ܓܺܝܓܠܴܐ܆ ܘܡܶܕܶܡ ܕܐܳܬܷܿܐ ܗ̱ܘܳܐ ܥܠܶܝܗܿ.

Oda 23, estrofa 17

ܐܶܓܰܪܬܳܐ ܗܘܳܬ ܕܦܽܘܩܕܳܢܳܐ܆ ܘܡܶܛܽܠ ܕܶܐܬܟܰܢܰܫܘ ܐܰܟܚܕܳܐ ܟܽܠܗܽܘܢܿ ܐܰܬܪ̈ܰܘܳܬܳܐ.

Oda 23, estrofa 18

ܘܐܶܬܚܙܺܝ ܒܪܺܝܫܳܗܿ ܪܺܝܫܳܐ ܕܶܐܬܓܠܺܝ܆ ܘܰܒܪܳܐ ܕܰܫܪܳܪܳܐ ܡܼܶܢ ܐܰܒܳܐ ܡܪܰܝܡܳܐ.

Oda 23, estrofa 19

ܘܝܺܪܶܬ ܟܽܠܡܶܕܶܡ ܘܰܢܣܰܒ܆ ܘܐܶܬܒܰܛܠܱܬ ܕܶܝܢ ܡܰܚܫܰܒܬܳܐ ܕܣܰܓܺܝ̈ܐܷܐ.

Oda 23, estrofa 20

ܐܰܡܪܰܚܘ ܕܶܝܢ ܟܽܠܗܘܽܢܿ ܡܰܣܛܝܴ̈ܢܶܐ ܘܰܥܪܰܩܘ܆ ܘܰܕܥܶܟܘ ܐܰܝܿܠܶܝܢ ܕܪܳܕܦܺܝܢ ܘܐܶܬܥܰܛܺܝܘ.

Oda 23, estrofa 21

ܘܰܗܘܳܬ ܕܶܝܢ ܐܶܓܰܪܬܳܐ ܦܶܢܩܺܝܬܳܐ ܪܰܒܬܳܐ܆ ܕܰܟܬܺܝܒܳܐ ܒܨܶܒܥܶܗ ܕܰܐܠܳܗܳܐ ܡܫܰܡܠܝܳܐܻܝܬ.

Oda 23, estrofa 22

ܘܰܫܡܳܐ ܕܰܐܒܳܐ ܥܠܶܝܗܿ܆ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ܆ ܠܰܡܡܰܠܳܟܽܘ ܠܥܳܠܰܡ ܥܳܠܡܺܝܢ. ܗܰܠܶܠܘܽܝܰܐ.

Oda 24, estrofa 1

ܝܰܘܢܳܐ ܦܼܰܪܚ݀ܰܬ ܥܰܠ ܪܺܝܫܶܗ ܕܡܳܪܰܢ ܡܫܺܝܚܳܐ܆ ܡܶܛܽܠ ܕܪܺܝܫܳܐ ܗܘܳܐ ܠܳܗܿ.

Oda 24, estrofa 2

ܘܙܰܡܼܪܰܬܿ ܥܠܰܘܗ̱ܝ܆ ܘܐܶܫܬܡܰܥ ܩܳܠܳܗܿ.

Oda 24, estrofa 3

ܘܰܕܚܶܠܘ ܥܳܡܽܘܪ̈ܶܐ܆ ܘܐܶܬܬܙܺܝܥܘ ܬܰܘܬܳܒܷ̈ܐ.

Oda 24, estrofa 4

ܦܳܪܰܚܬܳܐ ܫܶܒܼܩ݀ܰܬ ܓܶܦܶܝ̈ܗܿ܆ ܘܪܰܚܫܳܐ ܟܽܠܶܗ ܡܺܝܬ ܒܚܽܘܠܳܢܶܗ.

Oda 24, estrofa 5

ܘܰܬܗ̈ܽܘܡܳܝܶܐ ܐܶܬܦܰܬܼܰܚܘ ܘܐܶܬܟܰܣܺܝܘ܆ ܘܰܗܘܰܘ ܒܿܳܥܶܝܢ ܠܡܳܪܝܳܐ ܐܰܝܟ ܗܿܳܢܶܝܢ ܕܝ̈ܳܠܕܳܢ.

Oda 24, estrofa 6

ܘܠܴܐ ܐܶܬܺܝܗܶܒ ܠܗܽܘܢܿ ܠܡܶܐܟܽܘܠܬܳܐ܆ ܡܶܛܽܠ ܕܠܴܐ ܗ̱ܘܼܳܐ ܕܺܝܠܗܽܘܢ ܗ̱ܘܼܳܐ.

Oda 24, estrofa 7

ܘܰܛܒܰܥܘ ܕܶܝܢ ܬܗ̈ܘܽܡܶܐ ܒܛܘܽܒܳܥܶܗ ܕܡܳܪܝܳܐ܆ ܘܐܶܒܰܕܘ ܒܗܳܝܿ ܡܰܚܫܰܒܬܳܐ ܕܺܐܝܬܰܝܗܽܘܢ ܗ̱ܘܰܘ ܡܼܶܢ ܠܽܘܩܕܰܡ.

Oda 24, estrofa 8

ܚܰܒܶܠܘ ܓܶܝܪ ܡܼܶܢ ܒܪܺܝܫܺܝܬ܆ ܘܫܽܘܠܳܡܳܐ ܕܚܽܘܒܳܠܗܽܘܢܿ ܐܺܝܬܰܘܗ̄ܝ ܗ̱ܘܳܐ ܚܰܝܷ̈ܐ.

Oda 24, estrofa 9

ܘܐܶܒܼܰܕ ܡܶܢܗܽܘܢܿ ܟܽܠ ܕܚܰܣܺܝܪ ܗ̱ܘܳܐ܆ ܡܶܛܽܠ ܕܠܰܝܬ ܗ̱ܘܳܐ ܠܗܽܘܢ ܠܡܶܬܰܠ ܦܶܬܓܳܡܳܐ ܐܰܝܟ ܕܰܢܩܰܘܽܘܢܿ.

Oda 24, estrofa 10

ܘܡܳܪܝܳܐ ܡܰܚܫ̈ܒܳܬܳܐ ܐܰܘܒܶܕ܆ ܕܟܽܠܗܽܘܢܿ ܐܰܝܠܶܝܢ ܕܠܰܝܬ ܠܘܳܬܗܽܘܢܿ ܫܪܳܪܳܐ.

Oda 24, estrofa 11

ܚܣܰܪܘ ܓܶܝܪ ܡܼܶܢ ܚܶܟܡܬܳܐ܆ ܗܳܢܽܘܢܿ ܕܡܶܬܬܪܺܝܡܺܝܢ ܗ̱ܘܰܘ ܒܠܶܒܗܽܘܢܿ.

Oda 24, estrofa 12

ܘܐܶܣܬܠܺܝܘ܆ ܡܶܛܽܠ ܕܠܰܝܬ ܗ̱ܘܳܐ ܠܘܳܬܗܽܘܢܿ ܫܪܳܪܳܐ.

Oda 24, estrofa 13

ܡܶܛܽܠ ܕܡܳܪܝܳܐ ܚܰܘܺܝ ܐܽܘܪܚܶܗ܆ ܘܐܰܦܬܺܝ ܛܰܝܒܽܘܬܶܗ.

Oda 24, estrofa 14

ܘܗܿܳܢܽܘܿܢ ܕܶܐܫܬܰܘܕܥܽܘܗܿ܆ ܝܳܕܥܺܝܢ ܚܰܣܝܘܽܬܶܗ. ܗܰܠܶܠܘܽܝܰܐ.

Oda 25, estrofa 1

ܐܶܬܦ݀ܰܠܛܶܬ ܡܼܶܢ ܐܰܣܽܘܪ̈ܰܝ܆ ܘܰܠܘܳܬܳܟ ܥܶܪܩܷܿܬ ܐܰܠܳܗܝ.

Oda 25, estrofa 2

(ܡܶܛܽܠ ܕܰܗܘܼܰܝܬ ܝܰܡܺܝܢܳܐ ܕܦܽܘܪܩܳܢܳܐ܆) ܘܰܡܥܰܕܪܳܢܳܐ ܕܺܝܠܝ.

Oda 25, estrofa 3

ܟܠܼܰܝܬ ܠܐܰܝܠܶܝܢ ܕܩܳܝܡܺܝܢ ܠܘܽܩܒܰܠܝ܆ ܘܬܽܘܒ (ܠܴܐ ܐܶܬܚܙܺܝܘ).

Oda 25, estrofa 4

ܡܶܛܽܠ ܕܦܰܪܨܘܽܦܳܟ ܥܰܡܝ ܗ̱ܘܳܐ܆ ܗܰܘܿ ܕܰܦܼܪܰܩ ܗ̱ܘܳܐ ܠܻܝ ܒܛܰܝܒܘܽܬܳܟ.

Oda 25, estrofa 5

ܐܶܬܿܬܫܺܝܛܶܬ ܕܶܝܢ ܘܐܷܣܿܬܠܺܝܬ ܒܥܰܝ̈ܢܰܝ ܣܰܓܺܝ̈ܐܷܐ܆ ܘܰܗܘܺܝܿܬ ܒܥܰܝܢܰܝ̈ܗܘܽܢܿ ܐܰܝܟ ܐܰܒܳܪܳܐ.

Oda 25, estrofa 6

ܘܰܗܘܳܐ ܠܺܝ ܥܽܘܫܢܳܐ ܡܼܶܢ ܠܘܳܬܳܟ܆ ܘܥܽܘܕܪܳܢܳܐ.

Oda 25, estrofa 7

ܫܪܳܓܳܐ ܣܳܡܼܬ ܠܺܝ ܡܼܶܢ ܝܰܡܺܝܢܝ ܘܡܼܶܢ ܣܶܡܳܠܝ܆ ܕܠܴܐ ܢܶܗܘܶܐ ܒܺܝ ܡܶܕܶܡ ܕܠܴܐ ܢܽܘܗܪܳܐ.

Oda 25, estrofa 8

ܘܐܶܬܿܟܰܣܺܝܬ ܒܬܰܟܣܺܝܬܳܐ ܕܪܽܘܚܳܟ܆ ܘܰܐܪܺܝܡܶܬ ܡܢܝ ܠܒܽܘ̈ܫܰܝ ܕܡܶܫܟܳܐ.

Oda 25, estrofa 9

ܡܶܛܽܠ ܕܝܰܡܺܝܢܳܟ ܐܰܪܺܝܡܬܳܢܝ܆ ܘܰܐܥܒܰܪܬ ܟܽܘܪܗܳܢܳܐ ܡܶܢܝ.

Oda 25, estrofa 10

ܘܰܗܘܺܝܿܬ ܚܰܝܠܬܳܢܳܐ ܒܰܫܪܳܪܳܟ܆ ܘܚܰܣܝܳܐ ܒܙܰܕܺܝܩܽܘܬܳܟ.

Oda 25, estrofa 11

(ܘܰܕܚܶܠܼܘ ܡܶܢܝ ܟܽܠܗܽܘܢܿ ܕܠܽܘܩܒܰܠܝ)܆ ܘܰܗܘܺܝܿܬ ܕܡܳܪܝܳܐ ܒܰܫܡܶܗ ܕܡܳܪܝܳܐ.

Oda 25, estrofa 12

ܘܐܷܙܕܰܕܩܰܬ ܒܒܰܣܺܝܡܽܘܬܶܗ܆ ܘܰܢܝܳܚܶܗ ܠܥܳܠܰܡܥܳܠܡܺܝܢ ܗ̱ܽܘܼ. ܗܰܠܶܠܘܽܝܰܐ.

Oda 26, estrofa 1

ܐܰܒܿܥܶܬ ܬܶܫܒܽܘܚܬܳܐ ܠܡܳܪܝܳܐ܆ ܡܶܛܽܠ ܕܕܺܝܠܶܗ ܐܶܢܳܐ.

Oda 26, estrofa 2

ܘܐܷܡܰܠܶܠ ܙܡܺܝܪܬܳܐ ܩܰܕܺܝܫܬܳܐ ܕܺܝܠܶܗ܆ ܡܶܛܽܠ ܕܠܶܒܝ ܠܘܳܬܶܗ ܗ̱ܽܘܼ܆

Oda 26, estrofa 3

ܩܺܝܬܳܪܶܗ ܓܶܝܪ ܒܐܺܝ̈ܕܰܝ܆ ܘܠܴܐ ܢܶܫ̈ܠܝܳܢ ܙܡܺܝܪ̈ܳܬܳܐ ܕܰܢܝܳܚܶܗ.

Oda 26, estrofa 4

ܐܶܓܥܶܐ ܠܘܳܬܶܗ ܡܼܳܢ ܟܽܠܶܗ ܠܶܒܝ܆ ܐܶ݀ܫܰܒܰܚ ܘܶܐܪܰܡܪܡܺܝܘܗ̱ܝ ܡܼܶܢ ܟܽܠܗܽܘܢܿ ܗܰܕܳܡܱ̈ܝ.

Oda 26, estrofa 5

ܡܼܶܢ ܡܰܕܢܚܳܐ ܓܶܝܪ ܘܰܥܕܰܡܳܐ ܠܡܰܥܪܒܳܐ܆ ܬܶܫܒܽܘܚܬܳܐ ܕܺܝܠܶܗ ܗ̱ܺܝܼ.

Oda 26, estrofa 6

ܘܡܼܶܢ ܬܰܝܡܢܳܐ ܘܰܥܕܰܡܳܐ ܠܓܰܪܒܝܳܐ܆ ܕܺܝܠܶܗ ܗ̱ܺܝܼ ܬܰܘܕܺܝܬܳܐ.

Oda 26, estrofa 7

ܘܡܼܶܢ ܪܺܝܫܳܐ ܕܪ̈ܰܘܡܶܐ ܘܰܥܕܰܡܳܐ ܠܚܰܪܬܗܽܘܢܿ܆ ܫܽܘܡܠܳܝܶܗ ܕܺܝܠܶܗ ܗ̱ܽܘܼ.

Oda 26, estrofa 8

ܡܰܢܽܘ ܕܟܴܿܬܶܒ ܙܡܺܝܪ̈ܳܬܶܗ ܕܡܳܪܝܳܐ܆ ܐܰܘ ܡܰܢܽܘ ܕܩܴܿܪܶܐ ܠܗܶܝܢ.

Oda 26, estrofa 9

ܐܰܘ ܡܰܢܽܘ ܕܪܳܕܶܐ ܢܰܦܫܶܗ ܠܚܰܝܷ̈ܐ܆ ܕܬܶܬܼܦܪܶܩܝ ܢܰܦܫܶܗ.

Oda 26, estrofa 10

ܐܰܘ ܡܰܢܽܘ ܕܡܶܬܬܢܺܝܚ ܥܰܠ ܡܪܰܝܡܳܐ܆ ܕܰܢܡܰܠܶܠ ܡܼܶܢ ܦܽܘܡܶܗ.

Oda 26, estrofa 11

ܡܰܢܽܘ ܡܶܫܟܰܚ ܕܰܢܬܰܪܓܶܡ ܬܶܕܡܪ̈ܳܬܶܗ ܕܡܳܪܝܳܐ܆ ܡܶܛܽܠ ܓܶܝܪ ܕܗܰܘܿ ܕܰܡܬܰܪܓܶܡ ܢܶܫܼܬܪܶܐ܆ ܘܰܢܩܰܘܶܐ ܗܰܘܿ ܕܡܶܬܬܰܪܓܰܡ.

Oda 26, estrofa 12

ܣܳܦܶܩ ܓܶܝܪ ܠܡܶܕܰܥ ܘܰܠܡܶܬܬܢܳܚܽܘ܆ ܡܙܰܡܪ̈ܳܢܶܐ ܓܶܝܪ ܩܳܝܿܡܺܝܢ ܒܢܺܝܚܽܘܬܳܐ.

Oda 26, estrofa 13

ܐܰܝܟ ܢܰܗܪܳܐ ܕܐܺܝܬ ܠܶܗ ܡܰܒܽܘܥܳܐ ܥܰܬܺܝܪܳܐ܆ ܘܪܳܕܶܐ ܠܥܽܘܕܪܳܢܳܐ ܕܐܰܝܠܶܝܢ ܕܒܳܥܶܝܢ ܠܶܗ. ܗܰܠܶܠܘܽܝܰܐ.

Oda 27, estrofa 1

ܦܶܫܿܛܶܬ ܐܻܝ̈ܕܰܝ܆ ܘܩܰܕܫܷܿܬ ܠܡܳܪܝ.

Oda 27, estrofa 2

ܡܶܛܽܠ ܕܰܡܬܳܚܳܐ ܕܐܻܝ̈ܕܰܝ܆ ܐܳܬܷܿܗ̄ ܗ̱ܝܼ.

Oda 27, estrofa 3

ܘܰܦܫܺܝܛܽܘܬܝ܆ ܩܰܝܣܳܐ ܕܰܬܪܺܝܨ. ܗܰܠܶܠܘܽܝܰܐ.

Oda 28, estrofa 1

ܐܰܝܟ ܓܶܦܷ̈ܐ ܕܝܰܘ̈ܢܶܐ ܥܰܠ ܦܰܪ̈ܽܘܓܰܝܗܶܝܢ܆ ܘܦܽܘ̈ܡܶܐ ܕܦܰܪ̈ܽܘܓܰܝܗܶܝܢ ܠܘܳܬ ܦܽܘ̈ܡܰܝܗܶܝܢ܆ ܗܳܟܰܢܳܐ ܐܳܦ ܓܶܦܷ̈ܝܗܿ ܕܪܽܘܚܳܐ ܥܰܠ ܠܶܒܝ.

Oda 28, estrofa 2

ܡܶܬܒܰܣܰܡ ܠܶܒܝ ܘܕܳܐܶܨ܆ ܐܰܝܟ ܥܽܘܼܠܴܐ ܕܕܳܐܷܨ ܒܟܰܪܣܳܐ ܕܐܶܡܶܗ.

Oda 28, estrofa 3

ܗܰܝܡܿܢܶܬ ܡܶܛܠ ܗܳܢܳܐ ܐܳܦ ܐܶܬܬܢܻܿܚܶܬ܆ ܡܶܛܽܠ ܕܰܡܗܰܝܡܰܢ ܗ̱ܽܘܼ ܗܰܘܿ ܕܗܰܝܡܢܶܬ ܒܶܗ.

Oda 28, estrofa 4

ܡܒܰܪܳܟܽܘ ܒܰܪܟܰܢܝ܆ ܘܪܺܝܫܝ ܠܘܳܬܶܗ ܗ̱ܽܘܼ.

Oda 28, estrofa 5

ܘܚܰܪܒܳܐ ܠܴܐ ܬܦܰܠܓܰܢܝ ܡܶܢܶܗ܆ ܐܳܦܠܴܐ ܣܰܦܣܺܪܳܐ.

Oda 28, estrofa 6

ܡܶܛܽܠ ܕܐܶܬܥܰܬܕܶܬ ܡܼܶܢ ܩܕܳܡ ܕܢܶܗܘܶܐ ܐܰܒܕܳܢܳܐ܆ ܘܐܷܬܣܺܝܡܶܬ ܒܟܶܢܦܰܘ̈ܗ̱ܝ ܕܠܴܐ ܚܒܴܿܠܴܐ.

Oda 28, estrofa 7

ܘܥܰܦܩܽܘܢܝ ܚܰܝܷ̈ܐ ܕܠܴܐ ܡܰܘܬܳܐ܆ ܘܢܰܫܩܽܘܢܝ.

Oda 28, estrofa 8

ܘܡܶܢܗܽܘܢܿ ܐܺܝܬܶܝܗܿ ܪܽܘܚܳܐ ܕܒܺܝ܆ ܘܠܴܐ ܡܶܫܚܳܐ ܠܰܡܡܳܬ ܡܶܛܽܠ ܕܚܰܝܷ̈ܐ ܗ̱ܝ.

Oda 28, estrofa 9

ܐܶܬܕܰܡܰܪܘ ܐܰܝܠܶܝܢ ܕܚܳܙܶܝܢ ܗ̱ܘܘ ܠܺܝ܆ ܡܶܛܽܠ ܕܐܶܬܪܰܕܦܶܬ.

Oda 28, estrofa 10

ܘܰܣܒܼܰܪܘ ܕܶܐܬܒܰܠܥܶܬ ܠܺܝ܆ ܡܶܛܽܠ ܕܐܶܬܚܰܙܝܰܬ ܠܗܽܘܢܿ ܐܰܝܟ ܚܰܕ ܡܼܶܢ ܐܰܒܺܝ̈ܕܶܐ.

Oda 28, estrofa 11

ܘܰܛܠܾܘܡܝܳܐ ܕܶܝܢ ܕܺܝܠܝ܆ ܦܽܘܪܩܳܢܳܐ ܗܘܳܐ ܠܺܝ.

Oda 28, estrofa 12

ܘܣܽܘܠܳܢܗܽܘܢܿ ܕܶܝܢ ܗܘܝܿܺܬ܆ ܡܶܛܽܠ ܕܛܢܳܢܳܐ ܠܰܝܬ ܗ̱ܘܳܐ ܒܺܝ.

Oda 28, estrofa 13

ܡܶܛܽܠ ܕܰܠܟܽܠܢܳܫ ܥܴܿܒܶܕ ܗ̱ܘܺܝܿܬ ܛܳܒܳܬܐ܆ ܐܶܣܿܬܢܺܝܬ.

Oda 28, estrofa 14

ܘܚܰܕܪܽܘܢܝ ܐܰܝܟ ܟܰܠܒܷ̈ܐ ܦܰܩܪܷ̈ܐ܆ ܗܿܳܢܽܘܢܿ ܕܰܒܠܴܐ ܝܻܕܰܥܬܳܐ ܐܳܙܺܠ̱ܝܢ ܥܰܠ ܡܳܪ̈ܰܝܗܽܘܢܿ.

Oda 28, estrofa 15

ܡܶܛܽܠ ܕܰܡܚܰܒܠܴܐ ܗ̱ܝܼ ܬܰܪܥܺܝܬܗܽܘܢܿ܆ ܘܰܡܫܰܚܠܰܦ ܪܶܥܝܳܢܗܽܘܢܿ.

Oda 28, estrofa 16

ܐܶܢܳܐ ܕܶܝܢ ܡܰܝܴ̈ܐ ܐܰܚܺܝܕ ܗ̱ܘܺܝܿܬ ܒܝܰܡܺܝܢܝ܆ ܘܰܠܡܰܪܺܝܪܽܘܬܗܽܘܢ ܛܶܥܿܢܶܬ ܒܚܰܠܝܽܘܬܝ.

Oda 28, estrofa 17

ܘܠܴܐ ܐܶ݀ܒܕܶܬ ܡܶܛܽܠ ܕܠܴܐ ܗ̱ܘܺܝܿܬ ܐܰܚܽܘܬܗܽܘܢܿ܆ ܐܳܦܠܴܐ ܓܶܝܪ (ܝܺܠܺܝܕܽܘܬܝ ܐܰܟܘܳܬܗܽܘܢܿ).

Oda 28, estrofa 18

ܘܰܒܥܰܘ ܡܰܘܬܝ ܘܠܴܐ ܐܶܫܟܰܚܘ܆ ܡܶܛܽܠ ܕܩܰܫܺܝܫ ܗ̱ܘܺܝܿܬ ܡܼܶܢ ܕܽܘܟܪܳܢܗܽܘܢܿ܆ ܘܰܣܪܺܝܩܳܐܺܝܬ ܢܳܦܣܺܝܢ ܗ̱ܘܰܘ ܥܠܰܝ.

Oda 28, estrofa 19

ܘܐܰܝܠܶܝܢ ܕܡܼܶܢ ܒܳܬܰܪܝ ܗܘܰܘ܆ ܡܰܓܳܢ ܕܽܘܟܪܳܢܳܐ ܕܗܰܘܿ ܕܡܼܶܢ ܩܕܳܡܰܝܗܽܘܢܿ ܒܥܼܰܘ ܠܡܰܘܒܳܕܽܘ.

Oda 28, estrofa 20

ܡܶܛܽܠ ܕܠܴܐ ܡܶܬܩܰܕܡܳܐ ܬܰܪܥܺܝܬܶܗ ܕܰܡܪܰܝܡܳܐ܆ ܘܠܶܒܶܗ ܡܝܰܬܰܪ ܗ̱ܽܘܼ ܡܼܶܢ ܟܽܠ ܚܶܟܡܳܐ. ܗܰܠܶܠܘܽܝܰܐ.

Oda 29, estrofa 1

ܡܳܪܝܰܐ ܗ̱ܘ ܣܰܒܪܝ܆ ܠܴܐ ܐ݀ܒܗܰܬ ܒܶܗ.

Oda 29, estrofa 2

ܐܰܝܟ ܬܶܫܒܽܘܚܬܶܗ ܓܶܝܪ ܥܰܒܼܕܰܢܝ܆ ܘܐܰܝܟ ܛܰܝܒܽܘܬܶܗ ܗܳܟܰܢܳܐ ܐܳܦ ܝܰܗ̱ܒ ܠܺܝ.

Oda 29, estrofa 3

ܘܐܰܝܟ ܪ̈ܰܚܡܰܘܗ̱ܝ ܐܰܪܺܝܡܰܢܝ܆ ܘܐܰܝܟ ܒܪܰܒܽܘܬ ܝܳܐܝܽܘܬܶܗ ܪܰܡܪܡܰܢܝ.

Oda 29, estrofa 4

ܘܐܰܣܩܼܰܢܝ ܡܼܶܢ ܥܽܘܡ̈ܩܶܝܗܿ ܕܰܫܝܽܘܠ܆ ܘܡܼܶܢ ܦܽܘܡܶܗ ܕܡܰܘܬܳܐ ܢܰܓܕܰܢܝ.

Oda 29, estrofa 5

ܘܡܰܟܿܟܶܬ ܠܰܒܥܶܠܕܒܳܒܱ̈ܝ܆

Oda 29, estrofa 6

ܘܙܰܕܩܰܢܝ ܒܛܰܝܒܽܘܬܶܗ. ܗܰܝܡܿܢܶܬ ܓܶܝܪ ܒܰܡܫܺܝܚܶܗ ܕܡܳܪܝܳܐ܆

Oda 29, estrofa 7

ܘܐܶܬܚܙܺܝ ܠܺܝ ܕܗܽܘܝܽܘ ܡܳܪܝܳܐ. ܘܚܰܘܺܝ ܠܺܝ ܐܳܬܷܿܗ܆

Oda 29, estrofa 8

ܘܕܰܒܪܰܢܝ ܒܢܽܘܗܪܶܗ. ܘܝܰܗ̱ܒ ܠܺܝ ܚܽܘܛܪܳܐ ܕܚܰܝܠܬܳܢܽܘܬܶܗ܆ ܕܐܶܫܿܰܥܒܰܕ ܡܰܚܫ̈ܒܳܬܳܐ ܕܥܰܡ̈ܡܶܐ܆ ܘܥܽܘܫܢܳܐ ܕܓܰܢ̱ܒܳܪ̈ܶܐ ܠܰܡܡܰܟܳܟܽܘ.

Oda 29, estrofa 9

ܠܡܶܥܒܰܕ ܩܪܳܒܳܐ ܒܡܶܠܬܶܗ܆ ܘܙܳܟܽܘܬܳܐ ܠܡܶܣܼܰܒ ܒܚܰܝܠܶܗ.

Oda 29, estrofa 10

ܘܐܰܪܡܺܝ ܠܰܒܥܶܠܕܒܳܒܝ ܡܳܪܝܳܐ ܒܡܶܠܬܶܗ܆ ܘܰܗܘܼܳܐ ܐܰܝܟ ܥܽܘܪܳܐ ܕܫܳܩܠܴܐ ܠܶܗ ܪܽܘܚܳܐ.

Oda 29, estrofa 11

ܘܝܶܗܿܒܶܬ ܬܶܫܒܽܘܚܬܳܐ ܠܰܡܪܰܝܡܳܐ܆ ܡܶܛܽܠ ܕܐܱܘܪܒܶܗ ܠܥܰܒܕܶܗ ܘܠܰܒܪܳܗܿ ܕܰܐܡܬܶܗ. ܗܰܠܶܠܘܽܝܰܐ.

Oda 30, estrofa 1

ܡܠܰܘ ܠܟܽܘܢ ܡܰܝܴ̈ܐ ܡܼܶܢ ܡܰܒܽܘܥܶܐ ܚܰܝܳܐ ܕܡܳܪܝܳܐ܆ ܡܶܛܽܠ ܕܶܐܬܦܬܰܚ ܠܟܽܘܢ.

Oda 30, estrofa 2

ܘܬܰܘ ܟܽܠܟܽܘܢ ܨܗܰܝܴ̈ܐ ܘܣܰܒܘ ܡܰܫܬܝܳܐ܆ ܘܶܐܬܬܢܺܝܚܘ ܥܰܠ ܡܰܒܽܘܥܶܗ ܕܡܳܪܝܳܐ.

Oda 30, estrofa 3

ܡܶܛܽܠ ܕܫܰܦܺܝܪ ܗ̱ܽܘܼ ܘܰܢܩܶܕ܆ ܘܰܡܢܺܝܚ ܢܰܦܫܳܐ.

Oda 30, estrofa 4

ܡܼܶܢ ܕܶܒܫܳܐ ܓܶܝܪ ܣܰܓܺܝ ܒܰܣܺܝܡܺܝܢ ܡܰܘ̈ܗ̱ܝ܆ ܘܟܰܟܳܪܺܝܬܳܐ ܕܕܶܒܽܘܪ̈ܝܳܬܳܐ ܠܴܐ ܡܶܬܦܰܚܡܳܐ ܠܶܗ.

Oda 30, estrofa 5

ܡܶܛܽܠ ܕܡܶܢ ܣܶܦ̈ܘܳܬܶܗ ܕܡܳܪܝܳܐ ܢܿܦܰܩ܆ ܘܡܼܶܢ ܠܶܒܶܗ ܕܡܳܪܝܳܐ ܫܰܡܰܗ.

Oda 30, estrofa 6

ܘܐܷܬܳܐ ܟܰܕ ܠܴܐ ܡܶܣܬܰܝܰܟ ܘܠܴܐ ܡܶܬܚܙܶܐ܆ ܘܰܥܕܰܡܳܐ ܕܶܐܬܺܝܗܼܶܒ ܒܰܡܨܰܥܬܳܐ ܠܴܐ ܝܰܕܥܽܘܗ̱ܝ.

Oda 30, estrofa 7

ܛܽܘܒܰܝܗܽܘܢܿ ܠܐܰܝܠܶܝܢ ܕܶܐܫܬܺܝܘ ܡܶܢܶܗ܆ ܘܶܐܬܬܢܺܝܚ ܒܶܗ. ܗܰܠܶܠܘܽܝܰܐ.

Oda 31, estrofa 1

ܐܶܬܦܫܰܪܘ ܡܼܶܢ ܩܕܳܡ ܡܳܪܝܳܐ ܬܗܽܘ̈ܡܶܐ܆ ܘܶܐܬܩܰܒܰܠ ܚܶܫܽܘܟܳܐ ܡܼܶܢ ܚܶܙܘܶܗ.

Oda 31, estrofa 2

ܛܥ݀ܳܬ ܛܳܥܝܽܘܬܳܐ ܘܐܷܒܼܕܰܬܿ ܡܶܢܶܗ܆ ܘܫܺܝܛܽܘܬܳܐ (ܢܣܰܒܬܳܗܿ ܠܴܐ ܗܶܠܰܟܬܳܐ܆ ܘܛܶܒܼܥܰܬ) ܡܼܶܢ ܫܪܳܪܶܗ ܕܡܳܪܝܳܐ.

Oda 31, estrofa 3

ܦܽܘܡܶܗ ܦܬܰܚ ܘܡܰܠܶܠ ܛܰܝܒܽܘܬܳܐ ܘܚܰܕܽܘܬܳܐ܆ ܘܡܰܠܶܠ ܬܶܫܒܽܘܚܬܳܐ ܚܕܰܬܳܐ ܠܰܫܡܶܗ.

Oda 31, estrofa 4

ܘܰܐܪܺܝܡ ܩܳܠܶܗ ܠܘܳܬ ܡܪܰܝܡܳܐ܆ ܘܩܰܪܶܒ ܠܶܗ ܒܢܰܝܴ̈ܐ ܗܳܢܽܘܢܿ ܕܒܺܐܝܕܶܗ ܗܘܰܘ.

Oda 31, estrofa 5

ܘܐܶܙܕܰܕܰܩ ܦܰܪܨܽܘܦܶܗ܆ ܡܶܛܽܠ ܕܗܳܟܰܢܳܐ ܝܰܗ̱ܒ ܠܶܗ ܐܰܒܽܘܗ̱ܝ ܩܰܕܺܝܫܳܐ.

Oda 31, estrofa 6

ܦܽܘܩܘ ܗܳܢܽܘܢܿ ܕܶܐܬܐܶܠܶܨܘ܆ ܘܩܰܒܶܠܘ ܚܰܕܽܘܬܳܐ.

Oda 31, estrofa 7

ܘܺܝܪܰܬܘ ܢܰܦܫܟܽܘܢܿ ܒܝܰܕ ܛܰܝܒܽܘܬܳܐ܆ ܘܣܰܒܘ ܠܟܽܘܢܿ ܚܰܝܷ̈ܐ ܕܠܴܐ ܡܰܘܬܳܐ.

Oda 31, estrofa 8

ܘܚܰܝܒܽܘܢܝ ܟܰܕ ܩܳܡܷܿܬ܆ ܠܗܱܿܘ ܕܠܴܐ ܐܻܝܬܰܝ ܗ̱ܿܘܺܝܬ ܡܚܰܝܒܳܐ.

Oda 31, estrofa 9

ܘܦܰܠܶܓܘ ܒܶܙܰܬܝ܆ ܟܰܕ ܡܶܕܶܡ ܠܴܐ ܡܶܬܬܚܺܝܒ ܠܗܽܘܢܿ.

Oda 31, estrofa 10

ܐܶܢܳܐ ܕܶܝܢ ܣܰܝܿܒܪܶܬ ܘܫܶܬܩܿܶܬ ܘܰܫܿܠܺܝܬ܆ ܐܰܝܟ ܕܠܴܐ ܐܶܬܬܙܺܝܥ ܡܶܢܗܽܘܢܿ.

Oda 31, estrofa 11

ܐܶܠܴܐ ܩܳܡܷܿܬ ܕܠܴܐ ܙܰܘܥܬܳܐ ܐܰܝܟ ܟܺܐܦܳܐ ܫܰܪܺܝܪܬܳܐ܆ ܗ݀ܳܝ ܕܡܶܬܢܰܓܕܳܐ ܡܼܶܢ ܟܺܐܦܷ̈ܐ ܓ̈ܰܠܠܶܐ ܘܰܡܣܰܝܒܪܳܐ.

Oda 31, estrofa 12

ܘܣܶܒܿܠܶܬ ܡܰܪܺܝܪܽܘܬܗܽܘܢܿ ܡܶܛܽܠ ܡܰܟܺܝܟܽܘܬܳܐ܆ ܡܶܛܽܠ ܕܶܐܦܪܽܘܩ ܠܥܰܡܝ ܘܰܐܪܬܺܝܘܗ̱ܝ.

Oda 31, estrofa 13

ܘܰܕܠܴܐ ܐܷ݀ܣܰܪܶܩ ܠܫܽܘܘ̈ܕܳܝܶܐ ܕܰܠܘܳܬ ܪ̈ܺܝܫܰܝ ܐܰܒܴ̈ܗܳܬܳܐ܆ ܗܳܢܽܘܢܿ ܕܶܐܫܬܰܘܕܝܿܺܬ ܠܦܽܘܪܩܳܢܳܐ ܕܙܰܪܥܗܽܘܢܿ. ܗܰܠܶܠܘܽܝܰܐ.

Oda 32, estrofa 1

ܠܛܽܘ̈ܒܳܢܶܐ ܚܰܕܽܘܬܳܐ ܡܼܶܢ ܠܶܒܗܽܘܢܿ܆ ܘܢܽܘܗܪܳܐ ܡܼܶܢ ܗܰܘܿ ܕܥܳܡܰܪ ܒܗܽܘܢܿ.

Oda 32, estrofa 2

ܘܦܶܬܓܳܡܳܐ ܡܼܶܢ ܫܪܳܪܳܐ ܗܰܘܿ ܕܰܗܘܳܐ ܡܼܶܢ ܢܰܦܫܶܗ.

Oda 32, estrofa 3

ܡܶܛܽܠ ܕܶܐܬܥܰܫܰܢ ܒܚܰܝܠܶܗ ܩܰܕܺܝܫܳܐ ܕܰܡܪܰܝܡܳܐ܆ ܘܗܽܘܼ ܕܠܴܐ ܙܽܘܥܙܳܥܰܐ ܗ̱ܘܼ ܠܥܳܠܰܡ ܥܳܠܡܺܝܢ. ܗܰܠܶܠܘܽܝܰܐ.

Oda 33, estrofa 1

ܪܶܗܼܛܰܬ ܕܶܝܢ ܬܽܘܒ ܛܰܝܒܽܘܬܳܐ ܘܫܶܒܼܩ݀ܰܬ ܠܰܚܒܴܿܠܴܐ܆ ܘܢܶܚܼܬܰܬ ܒܶܗ ܐܰܝܟ ܕܰܬܣܰܪܩܺܝܘܗ̱ܝ.

Oda 33, estrofa 2

ܘܰܐܘܒܶܕ ܠܰܐܒܕܳܢܳܐ ܡܼܶܢ ܩܕܳܡܰܘܗ̱ܝ܆ ܘܚܰܒܶܠ ܟܽܠܶܗ ܬܽܘܩܢܶܗ.

Oda 33, estrofa 3

ܘܩܳܡ ܥܰܠ ܪܺܝܫܳܐ ܪܳܡܴܿܐ ܘܰܫܒܼܰܩ ܩܳܠܶܗ܆ ܡܼܶܢ ܣܰܘ̈ܦܶܝܗܿ ܕܰܐܪܥܳܐ ܘܰܥܕܰܡܳܐ ܠܣܰܘ̈ܦܶܝܗܿ.

Oda 33, estrofa 4

ܘܰܢܓܰܕ ܠܘܳܬܶܗ ܠܟܽܠ ܐܰܝܠܶܝܢ ܕܶܐܫܬܡܰܥܘ ܠܶܗ܆ ܘܠܴܐ ܐܶܬܚܙܺܝ ܐܰܝܟ ܒܺܝܫܳܐ.

Oda 33, estrofa 5

ܐܶܠܴܐ ܩܳܡܼ݀ܰܬ ܒܬܽܘܠܬܳܐ ܓܡܺܝܪܬܳܐ܆ ܕܡܰܟܪܙܳܐ ܘܩܿܳܪܝܳܐ ܘܳܐܡܿܪܳܐ.

Oda 33, estrofa 6

ܒܢܱ̈ܝ ܐ̱ܢܳܫܳܐ ܐܶܬܦܢܰܘ܆ ܘܰܒܢܴ̈ܬܗܽܘܢܿ ܬܳܝܶܝ̈ܢ.

Oda 33, estrofa 7

ܘܰܫܒܽܘܩܘ ܐܽܘܪ̈ܚܳܬܶܗ ܕܰܚܒܴܠܴܐ ܗܳܢܳܐ܆ ܘܶܐܬܩܰܪܰܒܘ ܠܺܝ.

Oda 33, estrofa 8

ܘܶܐ݀ܥܽܘܠ ܒܟܽܘܢܿ܆ ܘܰܐܦܿܶܩܩܟܽܘܢ ܡܼܶܢ ܐܰܒܕܳܢܳܐ܆ ܘܶܐܚܰܟܶܡܟܽܘܢ ܒܽܐܘܪ̈ܚܳܬܳܐ ܕܰܫܪܳܪܳܐ.

Oda 33, estrofa 9

ܠܴܐ ܬܶܬܚܰܒܠܽܘܢ܆ ܐܳܦ ܠܴܐ ܬܺܐܒܕܽܘܢ.

Oda 33, estrofa 10

ܫܽܘܡܥܽܘܢܝ ܘܶܐܬܦܰܪܩܘ܆ ܛܰܝܒܽܘܬܶܗ ܓܶܝܪ ܕܰܐܠܳܗܳܐ ܡܡܰܠܠܴܐ ܐ̱ܢܳܐ ܒܟܽܘܢ.

Oda 33, estrofa 11

ܘܒܺܐܝ̈ܕܰܝ ܬܶܬܦܰܪܩܽܘܢ ܘܬܶܗܘܽܘܢ ܛܽܘܒܳܢܷ̈ܐ܆ ܕܰܝܿܢܳܟܽܘܢ ܐܶܢܳܐ ܐܺܝܬܰܝ.

Oda 33, estrofa 12

ܘܗܳܢܽܘܢ ܕܠܰܒܫܽܘܢܳܢܝ ܠܴܐ ܢܶܬܛܰܠܡܽܘܢ܆ ܐܶܠܴܳܐ ܢܶܩܢܽܘܢ ܒܥܳܠܡܳܐ ܚܰܕ̱ܬܳܐ ܠܴܳܐ ܚܒܳܠܴܐ.

Oda 33, estrofa 13

ܓܒܰܝ̈ ܗܰܠܶܟܘ ܒܺܝ܆ ܘܐܽܘܪ̈ܚܳܬܝ ܐܰܘܼܕܰܥ ܠܗܳܢܽܘܢܿ ܕܒܳܥܶܝܢ ܠܺܝ܆ ܘܐܰܬܟܶܠ ܐܶܢܽܘܢܿ ܥܰܠ ܫܶܡܝ. ܗܰܠܶܠܘܽܝܰܐ.

Oda 34, estrofa 1

ܠܰܝܬ ܐܽܘܪܚܳܐ ܩܫܺܝܬܳܐ ܐܰܝܟܳܐ ܕܠܶܒܳܐ ܦܫܺܝܛܳܐ܆ ܐܳܦ ܠܴܐ ܡܚܽܘܼܬܳܐ ܒܡܰܚ̈ܫܒܳܬܳܐ ܬܪ̈ܺܝܨܳܬܳܐ.

Oda 34, estrofa 2

ܐܳܦ ܠܴܐ ܥܰܠܥܳܠܴܐ ܒܥܽܘܡܩܳܗܿ ܕܡܰܚܫܰܒܬܳܐ ܢܰܗܺܝܪܬܳܐ.

Oda 34, estrofa 3

ܐܰܝܟܳܐ ܕܰܟܪܺܝܟ ܡܼܶܢ ܟܽܠ ܐܰܬܰܪ ܫܰܦܺܝܪܳܐ܆ ܠܰܝܬ ܒܶܗ ܡܶܕܶܡ ܕܰܦܠܺܝܓ.

Oda 34, estrofa 4

ܕܡܘܬܶܗ ܕܗܿܰܘ ܕܰܠܬܰܚܬ܆ ܗܽܘܝܽܘ ܗܿܰܘ ܕܰܠܥܶܠ.

Oda 34, estrofa 5

ܟܽܠܡܶܕܶܡ ܓܶܝܪ ܠܥܶܠ ܗܼܽܘ܆ ܘܰܠܬܰܚܬ ܠܰܝܬ ܡܶܕܶܡ܆ ܐܶܠܴܐ ܡܶܣܬܰܒܰܪ ܠܐܰܝܠܶܝܢ ܕܺܝܕܰܥܬܳܐ ܠܰܝܬ ܒܗܽܘܢܿ.

Oda 34, estrofa 6

ܛܰܝܒܽܘܬܳܐ ܐܶܬܓܰܠܝ݀ܰܬ ܠܦܽܘܪܩܳܢܟܽܘܢܿ܆ ܗܰܝܡܶܢܘ ܘܰܚܝܰܘ ܘܶܐܬܦܰܪܰܩܘ. ܗܰܠܶܠܘܽܝܰܐ.

Oda 35, estrofa 1

ܪܣܺܝܣܶܗ ܕܡܳܪܝܳܐ ܒܢܺܝܚܽܘܬܳܐ ܐܰܛܶܠ ܥܠܰܝ܆ ܘܰܥܢܳܢܳܐ ܕܰܫܠܳܡܳܐ ܐܰܩܺܝܡ ܠܥܶܠ ܡܼܶܢ ܪܺܝܫܝ.

Oda 35, estrofa 2

ܕܰܗܼܘܳܬ ܡܢܰܛܪܳܐ ܠܝܻ ܒܟܽܠܙܒܰܢ܆ ܘܦܽܘܪܩܳܢܳܐ ܗܼܘܳܬ ܠܻܝ.

Oda 35, estrofa 3

ܐܶܬܬܙܺܝܥܘ ܟܽܠܡܶܕܶܡ ܘܶܐܬܪܰܗܰܒܘ܆ ܘܰܢܦܰܩ ܡܶܢܗܽܘܢ ܬܶܢܳܢܳܐ ܘܕܺܝܼܢܳܐ.

Oda 35, estrofa 4

ܘܐܶܢܳܐ ܫܠܷܐ ܗ̱ܘܺܝܬ ܒܬܶܓܡܶܗ ܕܡܳܪܝܳܐ܆ ܘܝܰܬܺܝܪ (ܡܼܶܢ ܛܶܠܴܠܴܐ ܗܼܘܳܐ ܠܺܝ) ܘܝܰܬܺܝܪ ܡܼܶܢ ܫܶܬܶܐܣܬܳܐ.

Oda 35, estrofa 5

ܘܐܰܝܟ ܛܰܠܝܳܐ ܡܼܶܢ ܐܶܡܶܗ ܡܶܬܛܥܶܢ ܗ̱ܘܺܝܬ܆ ܘܝܰܗ̱ܒ ܠܺܝ ܚܰܠܒܳܐ ܛܰــܠܶܗ ܕܡܳܪܝܳܐ.

Oda 35, estrofa 6

ܘܶܐܬܪܰܒܺܝܬ ܒܡܰܘܗܰܒܬܶܗ܆ ܘܶܐܬܬܿܢܺܝܚܶܬ ܒܫܽܘܡܠܳܝܶܗ.

Oda 35, estrofa 7

ܘܦܶܫܿܛܶܬ ܐܺܝ̈ܕܰܝ ܒܣܽܘܠܳܩܳܗܿ ܕܢܰܦܫܝ܆ ܘܐܶܬܿܬܰܪܨܰܬ ܠܘܳܬ ܡܪܰܝܡܳܐ܆ ܘܶܐܬܦܰܪܩܰܬ ܠܘܳܬܳܗܿ. ܗܰܠܶܠܘܽܝܰܐ.

Oda 36, estrofa 1

ܐܶܬܬܢܺܝܚ݀ܰܬ ܥܰܠ ܪܽܘܚܶܗ ܕܡܳܪܝܳܐ܆ ܘܰܐܪܺܝܡܬܳܢܝ ܠܪܰܘܡܳܐ.

Oda 36, estrofa 2

ܘܰܐܩܺܝܡܬܳܢܝ ܥܰܠ ܪ̈ܶܓܠܰܝ ܒܪܰܘܡܶܗ ܕܡܳܪܝܳܐ܆ ܩܕܳܡ ܫܽܘܡܠܳܝܶܗ ܘܬܶܫܒܽܘܚܬܶܗ܆ ܟܰܕ ܡܫܰܒܰܚ ܐ̱ܢܳܐ ܒܬܽܘܩܳܢܳܐ ܕܰܙܡܺܝܪ̈ܳܬܶܗ.

Oda 36, estrofa 3

ܝܺܠܶܕܬܳܢܝ ܡܼܶܢ ܩܕܳܡ ܐܰܦܰܘܗ̱̈ܝ ܕܡܳܪܝܳܐ܆ ܘܟܰܕ ܒܰܪܢܳܫܳܐ ܐܺܝܬܰܝ܆ ܐܶܫܿܬܰܡܗܶܬ ܢܰܗܺܝܪܳܐ ܒܪܶܗ ܕܰܐܠܳܗܳܐ.

Oda 36, estrofa 4

ܟܰܕ ܡܫܰܒܰܚ ܐ̱ܢܳܐ ܒܰܡܫܰܒ̈ܚܶܐ܆ ܘܪܰܒ ܐ̱ܢܳܐ ܒܪܰܘܪ̈ܒܳܢܶܐ.

Oda 36, estrofa 5

ܐܰܝܟ ܪܰܒܽܘܬܶܗ ܓܶܝܪ ܕܰܡܪܰܝܡܳܐ ܗܳܟܰܢܳܐ ܥܒܰܕܬܰܢܝ܆ ܘܐܰܝܟ ܚܽܘܕܳܬܶܗ ܚܰܕܬܰܢܝ.

Oda 36, estrofa 6

ܘܡܰܫܚܰܢܝ ܡܼܶܢ ܡܫܰܡܠܝܽܘܬܶܗ܆ ܘܰܗܿܘܺܝܬ ܚܰܕ ܡܼܶܢ ܩܰܪ̈ܺܝܒܰܘܗ̱ܝ.

Oda 36, estrofa 7

ܘܶܐܬܦܰܬܰܚ ܦܽܘܡܝ ܐܰܝܟ ܥܢܳܢܳܐ ܕܛܰܠܴܐ܆ ܘܰܓܣܳܐ ܠܶܒܝ ܓܣܺܝܬܳܐ ܕܙܰܕܺܝܩܽܘܬܳܐ.

Oda 36, estrofa 8

ܘܰܗܘܳܐ ܩܽܘܪܳܒܝ ܒܰܫܠܳܡܳܐ܆ ܘܶܐܫܬܰܪܪܰܬ ܒܪܽܘܚܳܐ ܕܰܡܕܰܒܪܳܢܽܘܬܳܐ. ܗܰܠܶܠܘܽܝܰܐ.

Oda 37, estrofa 1

ܦܶܫܿܛܶܬ ܐܺܝ̈ܕܰܝ ܠܘܳܬ ܡܳܪܝܳܐ܆ ܘܰܠܘܳܬ ܡܪܰܝܡܳܐ ܐ݀ܰܪܺܝܡܶܬ ܩܳܠܝ.

Oda 37, estrofa 2

ܘܡܰܠܿܠܶܬ ܒܣܶܦ̈ܘܳܬܶܗ ܕܠܶܒܝ܆ ܘܫܰܡܥܰܢܝ ܟܰܕ ܢܦܰܠ ܩܳܠܝ ܠܘܳܬܶܗ.

Oda 37, estrofa 3

ܦܶܬܓܳܡܶܗ ܐܶܬܼܳܐ ܠܘܳܬܝ܆ ܕܝܰܗ̱ܒ ܠܺܝ ܦܺܐܪ̈ܶܐ ܕܥܰܡ̈ܠܰܝ.

Oda 37, estrofa 4

ܘܝܰܗ̱ܒ ܠܺܝ ܢܝܳܚܳܐ ܒܛܰܝܒܽܘܬܶܗ ܕܡܳܪܝܳܐ. ܗܰܠܶܠܘܽܝܰܐ.

Oda 38, estrofa 1

ܣܷܿܠܩܶܬ ܠܢܽܘܗܪܳܐ ܕܰܫܪܳܪܳܐ ܐܰܝܟ ܕܰܠܡܰܪܟܰܒܬܳܐ܆ ܘܕܰܒܼܪܰܢܝ ܫܪܳܪܳܐ ܘܰܐܝܬܝܰܢܝ.

Oda 38, estrofa 2

ܘܰܐܥܒܼܪܰܢܝ ܦܰܚ̈ܬܶܐ ܘܣܶܕܩ̈ܶܐ܆ ܘܡܼܶܢ ܫܩܺܝ̈ܦܶܐ ܘܓܰܠ̈ܠܶܐ ܦܰܪܩܰܢܝ.

Oda 38, estrofa 3

ܘܰܗܘܳܐ ܠܺܝ ܠܡܺܐܢܳܐ ܕܦܽܘܪܩܳܢܳܐ܆ ܘܣܳܡܰܢܝ ܥܰܠ ܕܰܪܓܳܐ ܕܚܰܝܷ̈ܐ ܕܠܴܐ ܡܰܘܬܳܐ.

Oda 38, estrofa 4

ܘܐܷܙܰܠ ܥܰܡܝ ܘܰܐܢܺܝܚ ܠܺܝ ܘܠܴܐ ܫܰܒܩܰܢܝ ܕܶܐܛܥܶܐ܆ ܡܶܛܽܠ ܕܰܫܪܳܪܳܐ ܐܺܝܬܰܘܗ̱ܝ ܗ̱ܘܳܐ ܘܗܼܽܘܝܽܘ.

Oda 38, estrofa 5

ܘܠܴܳܐ ܗܘܳܐ ܠܺܝ ܩܺܝܢܕܽܘܢܽܘܣ ܕܥܰܡܶܗ ܡܗܰܠܶܟ ܗ̱ܘܺܝܿܬ܆ ܘܠܴܐ ܛܥܺܝܬ ܒܡܶܕܶܡ ܡܶܛܽܠ ܕܶܐܫܿܬܰܡܥܶܬ ܠܶܗ.

Oda 38, estrofa 6

ܥܳܪܩܳܐ ܗ̱ܘܳܬ ܓܶܝܪ ܡܶܢܶܗ ܛܳܥܝܽܘܬܳܐ܆ ܘܠܴܳܐ ܐܳܪܥܳܐ ܗ̱ܘܳܬܿ ܠܶܗ.

Oda 38, estrofa 7

ܫܪܳܪܳܐ ܕܶܝܢ ܐܴ݀ܙܶܠ ܗ̱ܘܶܐ ܒܐܽܘܪܚܳܐ ܬܪܺܝܨܬܳܐ܆ ܘܟܽܠܡܶܕܶܡ ܕܠܴܐ ܝܿܳܕܰܥ ܗ̱ܘܺܝܿܬ ܠܶܗ ܡܚܰܘܶܐ ܗ̱ܘܳܐ ܠܺܝ.

Oda 38, estrofa 8

ܠܟܽܠܗܽܘܢܿ ܣܰܡ̱̈ܡܳܢܶܐ ܕܛܳܥܝܘܽܬܳܐ܆ ܘܰܠܢܶܓ̈ܕܶܐ ܗܳܢܽܘܢܿ ܕܰܣܒܺܝܪܺܝܢ ܕܚܰܠܝܽܘܬܳܐ ܗ̱ܝܼ ܕܡܰܘܬܳܐ.

Oda 38, estrofa 9

ܘܠܰܡܚܰܒܠܳܢܶܗ ܕܰܚܒܴܿܠܴܐ܆ ܚܿܳܙܶܐ ܗ̱ܘܺܝܿܬ ܟܰܕ ܡܶܨܛܰܒܬܳܐ ܗ̱ܘܳܬ ܟܰܠܬܳܐ ܕܰܡܚܰܒܠܴܐ܆ ܘܚܰܬܢܳܐ ܕܰܡܚܰܒܶܠ ܘܡܶܬܚܰܒܰܠ.

Oda 38, estrofa 10

ܘܫܿܶܐܠܶܬ ܠܰܫܪܳܪܳܐ ܕܡܰܢ ܐܶܢܽܘܢܿ ܗܳܠܶܝܢ܆ ܘܐܷܡܰܪ ܠܺܝ ܗܴܿܢܰܘ ܡܰܛܥܝܳܢܳܐ ܘܛܳܥܝܽܘܬܳܐ.

Oda 38, estrofa 11

ܘܡܶܬܕܰܡܶܝܢ ܒܚܰܒܺܝܒܳܐ ܘܰܒܟܰܠܬܶܗ܆ ܘܡܰܛܥܶܝܢ ܠܥܳܠܡܳܐ ܘܰܡܚܰܒܠܺܝܢ ܠܶܗ.

Oda 38, estrofa 12

ܘܩܳܪܶܝܢ ܠܣܰܓܺܝ̈ܐܶܐ ܠܡܶܫܬܽܘܬܳܐ܆ ܘܝܳܗܒܺܝܢ ܠܗܽܘܢܿ ܕܢܶܫܬܽܘܢ ܚܰܡܪܳܐ ܕܪܰܘܳܝܽܘܬܗܽܘܢܿ.

Oda 38, estrofa 13

ܘܰܡܬܺܝܒܺܝܢ ܚܶܟ̈ܡܳܬܗܽܘܢܿ ܘܡܰܕܥܰܝ̈ܗܽܘܢܿ܆ ܘܥܿܳܒܕܺܝܢ ܠܗܽܘܢܿ ܕܠܴܐ ܪܶܥܝܳܢܳܐ.

Oda 38, estrofa 14

ܘܗܳܝܕܶܝܢ ܫܳܒܩܺܝܢ ܠܗܽܘܢܿ܆ ܘܗܳܢܽܘܢܿ ܕܳܝܢ ܗܳܘܶܝܢ ܡܶܬܟܰܪܟܺܝܢ ܟܰܕ ܦܳܩܪܺܝܢ ܘܰܡܚܰܒܠܺܝܢ.

Oda 38, estrofa 15

ܟܰܕ ܠܰܝܬ ܒܗܽܘܢܿ ܠܶܒܳܐ܆ ܐܳܦ ܠܴܐ ܓܶܝܪ ܒܳܥܶܝܢ ܠܶܗ.

Oda 38, estrofa 16

ܘܶܐܬܚܰܟܿܡܶܬ ܐܶܢܳܐ ܕܠܴܐ ܢܶܦܿܠܶܬ ܒܺܐܝ̈ܕܰܝ ܡܰܛܥ̈ܝܳܢܶܐ܆ ܘܰܚܕܺܝܬ ܠܢܰܦܫܝ ܡܶܛܽܠ ܕܐܷܙܰܠ ܗ̱ܘܳܐ ܥܰܡܝ ܫܪܳܪܳܐ.

Oda 38, estrofa 17

ܘܶܐܫܬܰܪܪܶܬ ܕܶܝܢ ܘܰܚܝܝܼܺܬ ܘܶܐܬܦܰܪܩܶܬ܆ ܘܶܐܬܬܣܺܝ̈ܡܝ ܫܶܬܶܐܣ̈ܰܝ ܥܰܠ ܐܺܝܕܶܗ ܕܡܳܪܝܳܐ܆

Oda 38, estrofa 18

ܡܶܛܽܠ ܕܗܺܘ ܢܰܨܒܰܢܝ. ܗܽܘܼ ܓܶܝܪ ܣܼܳܡ ܥܶܩܳܪܳܐ܆ ܘܰܐܫܩܝܶܗ ܘܰܐܬܩܢܶܗ ܘܒܰܪܟܶܗ܆

Oda 38, estrofa 19

ܦܺܐܪ̈ܰܘܗ̱ܝ ܠܥܳܠܡܺܝܢ ܗܴܿܘܶܝܢ. (ܐܰܥܡܶܩ ܘܰܣܠܶܩ ܘܰܐܦܬܺܝ)܆ ܘܰܡܠܼܳܐ ܘܶܐܬܪܰܘܪܰܒ.

Oda 38, estrofa 20

ܘܶܐܫܬܰܒܰܚ ܡܳܪܝܳܐ ܒܰܠܚܽܘܕܰܘܗ̱ܝ܆ ܒܢܶܨܒܬܶܗ ܘܰܒܦܽܘܠܚܳܢܶܗ.

Oda 38, estrofa 21

ܒܝܰܨܺܝܦܽܘܬܶܗ ܘܰܒܒܽܘܪܟܬܳܐ ܕܣܶܦ̈ܘܳܬܶܗ܆ ܒܢܼܶܨܒܬܳܐ ܝܳܐܺܝܬܳܐ ܕܝܰܡܺܝܢܶܗ.

Oda 38, estrofa 22

ܘܒܰܫܟܺܝܚܽܘܬܳܐ ܕܢܶܨܒܬܶܗ܆ ܘܰܒܡܰܕܥܳܐ ܕܬܰܪܥܺܝܬܶܗ. ܗܰܠܶܠܘܽܝܰܐ.

Oda 39, estrofa 1

ܢܰܗܪ̈ܰܘܳܬܳܐ ܥܰܫܺܝ̈ܢܶܐ ܚܰܝܠܶܗ ܕܡܳܪܝܳܐ܆ ܕܠܰܐܝܠܶܢ ܕܰܡܒܰܣܪܺܝܢ ܥܠܰܘܗ̱ܝ ܡܰܝܬܶܝܢ ܒܳܬܰܪ ܪܺܝܫܗܽܘܢܿ.

Oda 39, estrofa 2

ܘܰܡܥܰܪܩܿܠܺܝܢ ܗܰܠܟܳܬܗ̈ܘܽܢܿ܆ ܘܡܰܣܪܚܺܝܢ ܡܰܥܒܪ̈ܳܬܗܽܘܢܿ.

Oda 39, estrofa 3

ܘܚܴܿܛܦܺܝܢ ܦܰܓܪ̈ܰܝܗܽܘܢܿ܆ ܘܰܡܚܰܒܠܺܝܢ ܢܰܦ̈ܫܳܬܗܽܘܢܿ.

Oda 39, estrofa 4

ܚܰܪܺܝܦܺܝܢ ܐܶܢܽܘܢܿ ܓܶܝܪ ܡܼܶܢ ܒܰܪ̈ܩܶܐ܆ ܘܩܰܠܺܝܠܺܝܢ.

Oda 39, estrofa 5

ܘܗܳܢܽܘܢܿ ܕܥܿܳܒܪܺܝܢ ܠܗܽܘܢܿ ܒܗܰܝܡܳܢܽܘܬܳܐ܆ ܠܴܐ ܢܶܬܬܙܺܝܥܽܘܢ.

Oda 39, estrofa 6

ܘܗܳܢܽܘܢ ܕܰܡܗܰܠܟܺܝܢ ܒܗܽܘܢܿ ܕܠܴܐ ܡܽܘܡܳܐ܆ ܠܴܐ ܢܶܬܕܰܠܚܽܘܢ.

Oda 39, estrofa 7

ܡܶܛܽܠ ܕܐܴܬܴܿܐ ܒܗܽܘܢܿ ܡܳܪܝܰܐ ܗ̱ܘ܆ ܘܐܴܬܴܿܐ ܗܳܘܝܳܐ ܐܽܘܪܚܳܐ ܕܗܳܢܽܘܢܿ ܕܥܿܳܒܪܺܝܢ ܒܰܫܡܶܗ ܕܡܳܪܝܳܐ.

Oda 39, estrofa 8

ܠܒܰܫܘ ܗܳܟܺܝܠ ܫܡܶܗ ܕܰܡܪܰܝܡܳܐ ܘܰܕܥܽܘܢܳܝܗ̱ܝ܆ ܘܬܶܥܒܪܽܘܢ ܕܠܴܐ ܩܺܝܢܕܽܘܢܽܘܣ܆ ܟܰܕ ܢܶܗܘܽܘܢ ܢܰܗܪ̈ܰܘܳܬܐ ܡܶܬܛܦܺܝܣܺܝܢ ܠܟܽܘܢ.

Oda 39, estrofa 9

ܓܫܼܰܪ ܐܶܢܽܘܢܿ ܡܳܪܝܳܐ ܒܡܶܠܬܶܗ܆ ܘܗܰܠܶܟ ܘܰܥܒܰܪ ܐܶܢܽܘܢܿ ܡܼܶܢ ܪܓܶܠ.

Oda 39, estrofa 10

ܘܥܶܩ̈ܒܳܬܶܗ ܩܳܝ̈ܡܳܢ ܥܰܠ ܡܰܝܴ̈ܐ ܘܠܴܐ ܐܶܬܚܱ̈ܒܰܠܝ܆ ܐܶܠܴܐ ܐܺܝܬܰܝܗܶܝܢ ܐܰܝܟ ܩܰܝܣܳܐ ܕܡܰܬܼܩܰܢ ܒܰܫܪܳܪܳܐ.

Oda 39, estrofa 11

ܘܡܶܟܳܐ ܘܡܶܟܳܐ ܡܶܬܬܪܺܝܡܺܝܢ ܗ̱ܘܰܘ ܓܰܠ̈ܠܶܐ܆ ܘܥܶܩ̈ܒܳܬܶܗ ܕܶܝܢ ܕܡܳܪܰܢ ܡܫܺܝܚܳܐ ܩܰܝܴ̈ܡܺܝܢ ܐܶܢܶܝܢ.

Oda 39, estrofa 12

ܘܠܴܐ ܡܶܬܥܱ̈ܛܝܳܢ܆ ܐܳܦܠܴܐ ܡܶܬܚܰܒ̈ܠܳܢ.

Oda 39, estrofa 13

ܘܐܶܬܬܣܺܝܡ݀ܰܬ ܐܽܘܪܚܶܐ ܠܐܰܝܠܶܝܢ ܕܥܳܒܪܺܝܢ ܒܳܬܪܶܗ܆ ܘܰܠܗܳܢܽܘܢܿ ܕܫܿܳܠܡܺܝܢ ܠܗܶܠܰܟܬܳܐ ܕܗܰܝܡܳܢܽܘܬܶܗ܆ ܘܣܳܓܕܺܝܢ ܠܰܫܡܶܗ. ܗܰܠܶܠܘܽܝܰܐ.

Oda 40, estrofa 1

ܐܰܝܟ ܕܢܳܛܶܦ ܕܶܒܫܳܐ ܡܼܶܢ ܟܰܟܳܪܺܝܬܳܐ ܕܕܶܒܽܘܪ̈ܝܳܬܳܐ܆ ܘܪܳܕܶܐ ܚܰܠܒܳܐ ܡܼܶܢ ܐܰܢ̱ܬܬܳܐ ܪܶܚܿܡܶܬ ܒܢܷ̈ܝܗܿ܆ ܗܳܟܰܢܳܐ ܐܳܦ ܣܰܒܪܝ ܥܠܰܝܟ ܗ̱ܽܘܼ ܐܰܠܳܗܝ.

Oda 40, estrofa 2

ܐܰܝܟ ܕܓܿܳܣܶܐ ܡܰܒܽܘܥܳܐ ܡܰܘ̈ܗ̱ܝ܆ ܗܳܟܰܢܳܐ ܓܳܣܶܐ ܠܶܒܝ ܬܶܫܒܽܘܚܬܶܗ ܕܡܳܪܝܳܐ܆ ܘܣܶܦܘ̈ܳܬܝ ܡܰܦ̈ܩܳܢ ܠܶܗ ܬܶܫܒܽܘܚܬܳܐ.

Oda 40, estrofa 3

ܘܠܶܫܳܢܝ ܚܠܷܐ ܒܥܶܢ̈ܝܳܢܰܘܗ̱ܝ܆ ܘܰܕܗܿܳܢܶܝܢ ܗܰ[ܕܳ]ܡ̈ـܰـ[ـܝ] ܒܰܙܡܺܝܪ̈ܳܬܶܗ.

Oda 40, estrofa 4

ܘܪ̈ܳܘܙܳܢ ܐܰܦܱ̈ܝ ܒܰܕܝܳܨܶܗ܆ ܘܰܕܝܳܨܳܐ ܪܽܘܚܝ ܒܚܽܘܒܶܗ܆ ܘܢܰܦܫܝ ܢܴܿܗܪܳܐ ܒܶܗ.

Oda 40, estrofa 5

ܘܕܳܚܠܴܐ ܒܶܗ ܢܶܬܬܟܶܠ܆ ܘܦܽܘܪܩܳܢܳܐ ܒܶܗ ܢܶܫܬܰܪܰܪ.

Oda 40, estrofa 6

ܘܝܽܘܬܪܳܢܶܗ ܐܺܝܬܰܝܗܽܘܢ ܚܳܝܷ̈ܐ ܕܠܴܐ ܡܰܘܬܳܐ܆ ܘܰܡܩܰܒ̈ܠܳܢܰܝܗܽܘܢ ܕܠܴܐ ܚܒܴܿܠܴܐ. ܗܰܠܶܠܘܽܝܰܐ.

Oda 41, estrofa 1

ܢܫܰܒܚܽܘܢ ܠܡܳܪܝܳܐ ܟܽܠܗܽܘܢܿ ܝܱܠ̈ܘܕܰܘܗ̱ܝ܆ ܘܰܢܣܰܒ ܫܪܳܪܳܐ ܕܗܰܝܡܳܢܽܘܬܶܗ.

Oda 41, estrofa 2

ܘܢܶܬܝܰܕܥܽܘܢ ܠܘܳܬܶܗ ܒܢܰܘ̈ܗ̱ܝ܆ ܡܶܛܽܠ ܗܳܢܳܐ ܢܶܙܡܰܪ ܒܚܽܘܒܶܗ.

Oda 41, estrofa 3

ܚܰܝܺܝܼܢܰܢ ܒܡܳܪܝܳܐ ܒܛܰܝܒܽܘܬܶܗ܆ ܘܚܰܝܷ̈ܐ ܡܩܲܰܒܠܺܝܢܰܢ ܒܰܡܫܺܝܚܶܗ.

Oda 41, estrofa 4

ܝܰܘܡܳܐ ܓܶܝܪ ܪܰܒܳܐ ܐܰܢܗܰܪ ܠܰܢ܆ ܘܰܬܡܺܝܗ ܗ̱ܽܘܼ ܕܝܰܗ̱ܒ ܠܰܢ ܡܼܶܢ ܬܶܫܒܚܴ̈ܬܶܗ.

Oda 41, estrofa 5

ܢܶܫܬܘܶܐ ܗܳܟܺܝܠ ܟܽܠܰܢ ܐܰܟܚܕܳܐ ܥܰܠ ܫܡܶܗ ܕܡܳܪܝܳܐ܆ ܘܰܢܝܰܩܪܺܝܘܗ̱ܝ ܒܛܳܒܽܘܬܶܗ.

Oda 41, estrofa 6

ܘܢܶܢܗܪ̈ܳܢ ܐܰܦܰܝ̈ܢ ܒܢܽܘܗܪܶܗ܆ ܘܢܶܬܗܰܓܽܘܢ ܠܶܒܰܘܴ̈ܬܰܢ ܒܚܽܘܒܶܗ܆ ܒܠܶܠܝܳܐ ܘܒܺܐܝܡܳܡܳܐ.

Oda 41, estrofa 7

ܢܕܽܘܨ ܡܼܶܢ ܕܝܳܨܶܗ ܕܡܳܪܝܳܐ.

Oda 41, estrofa 8

ܢܶܬܕܰܡܪܽܘܢ ܟܽܠܗܽܘܢܿ ܐܰܝܠܶܝܢ ܕܚܳܙܶܝܢ ܠܺܝ܆ ܡܶܛܽܠ ܕܡܶܢ ܓܶܢܣܳܐ ܐ̱ܚܪܺܢܳܐ ܐ̱ܢܳܐ.

Oda 41, estrofa 9

ܐܰܒܳܐ ܓܶܝܪ ܕܰܫܪܳܪܳܐ ܐܶܬܕܰܟܪܰܢܝ܆ ܗܰܘܿ ܕܰܩܢܼܳܢܝ ܡܼܶܢ ܒܪܺܝܫܺܝܬ.

Oda 41, estrofa 10

ܥܽܘܬܪܶܗ ܓܶܝܪ ܝܰܠܕܰܢܝ܆ ܘܡܰܚܫܰܒܬܳܐ ܕܠܶܒܶܗ.

Oda 41, estrofa 11

ܘܡܶܠܬܶܗ ܥܰܡܰܢ ܒܟܽܠܳܗܿ ܐܽܘܪܚܰܢ܆ ܦܳܪܽܘܩܳܐ ܕܡܰܚܶܐ ܘܠܴܐ ܡܰܣܠܷܐ ܢܰܦ̈ܫܳܬܰܢ.

Oda 41, estrofa 12

ܓܰܒܪܳܐ ܕܶܐܬܡܰܟܰܟ܆ ܘܶܐܬܬܪܺܝܡ ܒܙܰܕܺܝܩܽܘܬܳܐ ܕܺܝܠܶܗ.

Oda 41, estrofa 13

ܒܪܶܗ ܕܰܡܪܰܝܡܳܐ ܐܶܬܚܙܺܝ܆ ܒܫܽܘܡܠܳܝܳܐ ܕܰܐܒܽܘܗ̱ܝ.

Oda 41, estrofa 14

ܘܢܽܘܗܪܳܐ ܕܢܰܚ ܡܼܶܢ ܡܶܠܬܳܐ܆ ܗܳܝܿ ܕܡܶܢ ܩܕܺܝܡ ܒܶܗ ܗܘܼܳܬ.

Oda 41, estrofa 15

ܡܫܺܝܚܳܐ ܒܰܫܪܳܪܳܐ ܚܰܕ ܗ̱ܽܘܼ܆ ܘܶܐܬܺܝܕܰܥ ܡܼܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ܆ ...

Oda 41, estrofa 16

ܕܢܰܚܶܐ ܢܰܦ̈ܫܳܬܳܐ ܠܥܳܠܰܡ ܒܰܫܪܳܪܳܐ ܕܰܫܡܶܗ. ܬܶܫܒܽܘܚܬܳܐ ܚܕܰܬܳܐ ܠܡܳܪܝܳܐ ܡܼܶܢ ܐܰܝܠܶܝܢ ܕܡܰܚܒܺܝܢ ܠܶܗ. ܗܰܠܶܠܘܽܝܰܐ.

Oda 42, estrofa 1

ܦܶܫܿܛܶܬ ܐܺܝ̈ܕܰܝ ܘܐܶܬܿܩܰܪܒܶܬ ܠܘܳܬ ܡܳܪܝ܆ ܡܶܛܽܠ ܕܡܶܬܚܳܐ ܕܺܐܝ̈ܕܰܝ ܐܳܬܷܿܗ̄ ܗ̱ܝܼ.

Oda 42, estrofa 2

ܘܰܦܫܺܝܛܽܘܬܝ ܩܰܝܣܳܐ ܦܫܺܝܛܳܐ܆ ܐܶܬܬܠܺܝ ܥܰܠ ܐܽܘܪܚܶܗ ܕܰܬܪܺܝܨܶܐ.

Oda 42, estrofa 3

ܘܰܗܿܘܺܝܬ ܕܠܴܐ ܚܳܫܚܽܘ ܠܗܳܢܽܘܢܿ ܕܝܳܕܥܺܝܢ ܠܺܝ܆ ܡܶܛܽܠ ܕܶܐܬܛܫܶܐ ܠܗܳܢܽܘܢܿ ܕܠܴܐ ܐܰܚܺܝܕܺܝܢ ܗ̱ܘܰܘ ܠܺܝ.

Oda 42, estrofa 4

ܘܐܷܗܘܶܐ ܠܘܳܬ ܗܳܢܽܘܢܿ܆ ܡܰܚܒܺܝܢ ܠܺܝ.

Oda 42, estrofa 5

ܡܺܝܬܘ ܟܽܠܗܽܘܢܿ ܪ̈ܳܕܽܘܦܰܝ܆ ܘܰܒܥܰܐܘܽܢܝ ܗܳܢܽܘܢܿ ܕܰܣܒܰܪܘ ܥܠܰܝ ܡܶܛܽܠ ܕܚܰܝ ܐ̱ܢܳܐ.

Oda 42, estrofa 6

ܘܩܳܡܷܿܬ ܠܺܝ ܘܐܻܝܬܰܝ ܥܰܡܗܽܘܢܿ܆ ܘܐܶܡܰܠܶܠ ܒܦܽܘܡܰܝ̈ܗܽܘܢܿ.

Oda 42, estrofa 7

ܐܰܣܠܼܺܝܘ ܓܶܝܪ ܠܰܐܝܠܶܝܢ ܕܪܳܕܦܺܝܢ ܠܗܽܘܢܿ܆ ܘܰܐܪܡܿܺܝܬ ܥܠܰܝܗܽܘܢܿ ܢܺܝܪܶܗ ܕܚܽܘܒܝ.

Oda 42, estrofa 8

ܐܰܝܟ ܕܪܳܥܶܗ ܕܚܰܬܢܳܐ ܥܰܠ ܟܰܠܬܳܐ܆ ܗܳܟܰܢܳܐ ܢܺܝܪܝ ܥܰܠ ܐܰܝܠܶܝܢ ܕܝܳܕܥܺܝܢ ܠܺܝ.

Oda 42, estrofa 9

ܘܐܰܝܟ ܓܢܽܘܢܳܐ ܕܰܡܬܺܝܚ ܒܶܝܬ ܚܱ̈ܬܢܶܐ܆ ܗܳܟܰܢܳܐ ܚܽܘܒܝ ܥܰܠ ܐܰܝܠܶܝܢ ܕܰܡܗܰܝܡܢܺܝܢ ܒܺܝ.

Oda 42, estrofa 10

ܠܴܐ ܐܶܣܬܰܠܿܝܰܬ ܐܳܦܶܢ ܐܶܣܿܬܰܒܪܰܬ܆ ܘܠܴܐ ܐܶܒܿܕܶܬ ܐܳܦܶܢ ܪܢܰܘ ܥܠܰܝ.

Oda 42, estrofa 11

ܫܝܽܘܠ ܚܙܳܬܰܢܝ ܘܶܐܬܕܰܘܝܰܬ܆ ܘܡܰܘܬܳܐ ܐܰܬܻܝܒܰܢܝ ܘܰܠܣܰܓܺܝܷ̈ܐܐ ܥܰܡܝ.

Oda 42, estrofa 12

ܚܰܠܴܐ ܘܰܡܪܳܪ̈ܶܐ ܗܘܺܝܬ ܠܶܗ܆ ܘܢܶܚܿܬܶܬ ܥܰܡܶܗ ܟܡܳܐ ܕܺܐܝܬ ܗ̱ܘܳܐ ܒܶܗ ܥܽܘܡܩܳܐ.

Oda 42, estrofa 13

ܘܪ̈ܶܓܠܶܐ ܘܪܺܝܫܳܐ ܐܰܪܦܺܝ܆ ܡܶܛܽܠ ܕܠܴܐ ܐܶܫܟܰܚ ܠܰܡܣܰܝܒܳܪܽܘ ܦܰܪܨܽܘܦܝ.

Oda 42, estrofa 14

ܘܥܶܒܿܕܶܬ ܟܢܽܘܫܬܳܐ ܕܚܰܝܷ̈ܐ ܒܡܺܝ̈ܬܰܘܗ̱ܝ܆ ܘܡܰܠܿܠܶܬ ܠܘܳܬܗܽܘܢܿ ܒܣܶܦ̈ܘܳܬܳܐ ܚܰܝܴ̈ܬܳܐ܆ ܡܶܛܽܠ ܕܠܴܐ ܢܶܗܘܶܐ ܒܳܛܶܠ ܦܶܬܓܳܡܝ.

Oda 42, estrofa 15

ܘܰܪܗܶܛܘ ܠܘܳܬܝ ܗܳܢܽܘܢܿ ܕܡܺܝܬܘ܆ ܘܰܩܥܰܘ ܘܶܐܡܼܰܪܘ ܚܽܘܢܰܝܢ ܒܪܶܗ ܕܰܐܠܳܗܳܐ.

Oda 42, estrofa 16

ܘܰܥܒܶܕ ܥܰܡܰܢ ܐܰܝܟ ܒܰܣܺܝܡܽܘܬܳܟ܆ ܘܰܐܦܶܩܰܝܢ ܡܼܶܢ ܐܰܣܽܘܪ̈ܶܐ ܕܚܶܫܽܘܟܳܐ.

Oda 42, estrofa 17

ܘܰܦܬܰܚ ܠܰܢ ܬܰܪܥܳܐ܆ ܕܒܶܗ ܢܷܿܦܽܘܩ ܠܘܳܬܳܟ܆ ܚܳܙܶܝܿܢܰܢ ܓܶܝܪ ܕܠܴܐ ܡܶܬܩܰܪܰܒ ܠܳܟ ܡܰܘܬܰܢ.

Oda 42, estrofa 18

ܢܶܬܦܪܶܩ ܐܳܦ ܚܢܰܢ ܥܰܡܳܟ܆ ܡܶܛܽܠ ܕܰܐܢ̱ܬ ܗ̱ܽܘܼ ܦܳܪܽܘܩܰܢ

Oda 42, estrofa 19

ܐܶܢܳܐ ܕܶܝܢ ܫܶܡܿܥܶܬ ܩܳܠܗܽܘܢܿ܆ ܘܣܴܿܡܶܬ ܒܠܶܒܝ ܗܰܝܡܳܢܽܘܬܗܽܘܢܿ.

Oda 42, estrofa 20

ܘܣܴܿܡܶܬ ܥܰܠ ܪܺܝܫܗܽܘܢܿ ܫܶܡܝ܆ ܡܶܛܽܠ ܕܰܒܢܱ̈ܝ ܚܺܐܪ̈ܶܐ ܐܶܢܽܘܢܿ ܘܕܺܝܠܝ ܐܺܝܬܰܝܗܽܘܢܿ. ܗܰܠܶܠܘܽܝܰܐ.